Gjykata e Lartë po has në vështirësi në gjetjen e kandidaturave që plotësojnë kriteret ligjore për plotësimin e tre vakancave që i takojnë për të emëruar në Gjykatën Kushtetuese dhe këtë të hënë me urdhër të kryetarit të saj ka rihapur garën.
Thirrja për kandidatët është hapur këtë herë për mandatin e Vitore Tushës, aktualisht kryetare e Gjykatës Kushtetuese, por me mandat të skaduar.
Në kushte të tilla, kryetari i Gjykatës së Lartë rishpalli thirrjen për plotësimin e vendit vakant të krijuar nga mbarimi i mandatit të Tushës për pjesën e mbetur të mandatit 9-vjeçar të saj, që përfundon në muajin mars 2025.
Afati i pranimit të kërkesave të kandidatëve është 30 ditë nga data e publikimit të njoftimit. Pas përfundimit të këtij afati, Gjykata e Lartë i përcjell Këshillit të Emërimeve në Drejtësi dokumentacionin e paraqitur nga kandidatët për vlerësimin e kushteve dhe kritereve të emërimit të tyre në Gjykatën Kushtetuese.
Më pas, KED pasi verifikon kandidaturat dhe kualifikimet përkatëse të tyre i përcjell Gjykatës së Lartë emrat e kualifikuar për këtë pozicion sipas një renditjeje nga kandidati më i vlerësuar, te më pak i vlerësuari.
Në këtë listë, Gjykata e Lartë duhet të votojë për një emër, por kuorumi i nevojshëm për të mbajtur këtë votim është 14 anëtarë, ndërkohë që kjo gjykatë aktualisht ka 9 anëtarë. Thirrja e radhës për aplikime nga Gjykata e Lartë mbërrin pas takimit të fundjavës së kaluar mes kreut të Gjykatës së Lartë, Sokol Sadushi dhe Ambasadores së SHBA në Tiranë, Yuri Kim.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
