.png)
Gazeta Si - Banorët e zonës së Laprakës në Tiranë, banesat e të cilëve preken nga projekti i "Unazës së Madhe" kanë dalë në protestë mbrëmjen e të shtunës në rrethrrotullimin e ish-sheshit “Shqiponja”.
Atyre i janë bashkuar dhe banorët e "5 Majit", të cilët mbetën të pastrehë nga një tjetër projekt rindërtimi, të cilëve iu shembën banesat një javë më parë.
Protesta u shoqërua edhe me përplasje mes forcave të policisë dhe protestuesve, të cilët nuk pranonin të hapnin rrugën dhe të lejonin makinat të kalonin.
Protestuesit janë konfliktuar edhe me shoferët e makinave që tentonin të kalonin në rrugë, por ishin të bllokuar. Pasi bllokuan trafikun për disa minuta te ish-sheshi-“Shqiponja”, ata u shpërndanë me ndërhyrjen e policisë.
E pranishme në protestë ishte edhe nënë Liza, që u shndërrua simbol i protestës së '5 Majit'. "Kauzat tona janë të drejta, nga sot ne i jemi bashkuar protestës së banorëve të Laprakës dhe protestat tona do të vazhdojnë të përbashkëta deri në zgjidhjen e kërkesave tona", u shpreh një nga banorët e "5 Majit”.
Banorët i kanë bërë thirrje kryeministrit Rama, që të mbajë premtimin që u bëri atyre në vitin 2013 për legalizimin e banesave.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
