Bajerni humbi të shtunën kundër Borusia Mënshengladbah, por për Paul Vaner ishte gjithsesi një mbrëmje speciale. Bavarezët nuk kishin 10 lojtarë, disa të infektuar nga Covid-i, të tjerë të dëmtuar dhe disa të impenjuar në Kupën e Afrikës. Për këtë arsye, Nagelsman grumbulloi disa lojtarë nga të rinjtë për të kompletuar skuadrën.
Në minutën e 75-të trajneri gjerman hodhi në fushë Paul Vaner, i datëlindjes 2005, që në moshën 16 vjeç e 15 ditë është debutuesi më i ri në historinë e Bajernit të Mynihut (para tij ishte Musiala, 17 vjeç e 115 ditë) dhe debutuesi i dytë më i ri në historinë e Bundesligës (para tij Moukoko, që me Dortmundin luajti 16 vjeç e 1 ditë).
I shpejtë dhe i shkathët, Vaner mbulon të gjitha pozicionet në sulm, por preferon qendrën, pra të luajë pas sulmuesit kryesor. Ai ishte në grumbullim me kombëtaren U-17 në Spanjë, por u thirr me shpejtësi nga drejtuesit e Bajernit, të gjendur në vështirësi para ndeshjes së fundit nga mungesat e shumta. Bajerni e ka marrë këtë lojtar nga Ravensburg, kur ishte 12 vjeç.
Në moshën 15-vjeçare nisi të luajë me të rinjtë. Gjysmë gjerman dhe gjysmë austriak, Vaner është një mëngjarash natyral, por është i zoti edhe me të djathtën. Sulmuesi i ri i ka të dyja pasaportat, gjermane dhe austriake.
“Është një talent i jashtëzakonshëm, – ka thënë për të trajneri Nagelsman. – Duhet të qëndrojë me këmbë në tokë dhe nëse e bën, do t’i hapen të gjitha dyert. E ardhmja e tij do të vendoset nga mendja e tij, nëse do të llogaritej vetëm kualiteti që ka në këmbë, gjithçka do të ishte e kryer”. Me përulësi dhe durim Vaner mund t’ia dalë të bëhet një yll botëror, ndoshta duke shfrytëzuar mundësitë që do t’i jepen.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
