Urimi i tij në Instagram ishte për një 2022 pa “virusin e mu***”, por sot Lionel Mesi ka rezultuar pozitiv ndaj Covid-it dhe nuk ka mundur të paraqitet në grumbullimin e PSG-së. Argjentinasi nuk mud të kthehet në Francë deri në momentin që do të jetë negativ.
Nesër klubi parisien do të luajë ndaj Vanes, skuadër e kategorisë së 4-t, në Kupën e Francës, pa tre lojtarët e grumbulluar për Kupën e Afrikës dhe tre lojtarë të tjerë që kanë dalë pozitivë, mes të cilëve edhe Bernat. Spanjolli dje u stërvit me skuadrën dhe për këtë arsye në klub janë të frikësuar se mund të kemi të bëjmë me një vatër infeksioni.
Mesi duhej të ishte sot në Paris, por shtypi francez ka bërë me dije se sulmuesi ka dalë pozitiv. “Leo, – ka saktësuar trajneri Poketino, – është në kontakt me stafin mjekësor të klubit. Derisa të mos ketë në dorë një tampon negativ, ai nuk mund të kthehet”. Fituesi i “Topit të Artë” i ka kaluar në vendlindje festat e fundvitit dhe aty është infektuar.
Kanë dalë pozitivë edhe portieri Riko, i riu Bitumazala dhe Bernat, që u stërvit me shokët e skuadrës një ditë më parë, duke ngritur alarmin për të tjera raste pozitive. “Frika është, – ka pohuar Poketino, – pavarësisht masave që ne marrim gjithmonë”. Dialo, Gueje dhe Hakimi janë lojtarët që mungojnë, pasi janë grumbulluar me kombëtaret e tyre për Kupën e Afrikës. Nejmar, i dëmtuar, do të kthehet në Francë më 9 janar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
