Kreu i Prokurorisë së Posaçme, Arben Kraja deklaroi se struktura që ai drejton po heton tenderat e dhënë për të tre incineratorët, jo vetëm për atë të Elbasanit, për të cilin është ngritur akuza ndaj ish-ministrit të Mjedisit, Lefter Koka.
“Ka hetime për të tre incineratorët dhe çështja është nën hetim dhe ato vazhdojnë”, deklaroi Kraja shkurtimisht para mediave pas pjesëmarrjes në tryezën e analizës vjetore të Këshillit të Lartë të Prokurorisë dhe Këshillit të Lartë Gjyqësor.
Pa hyrë shumë në detaje, kreu i SPAK u shpreh se ka një mori hetimesh në lidhje me tenderat e dhënë, ku baza e informacionit në këto hetime është marrë nga Kontrolli i Lartë i Shtetit.
“Kemi shumë hetime për procedurat e prokurimeve publike. Burimet e informacionit janë të shumta, qoftë nga Kontrolli i Lartë i Shtetit, nga biznesmenë të ndryshëm, individë dhe rezultatet janë publike”, u shpreh ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
