“Vriteni virusin dhe bizneset”, “Na lini të kërcejmë” janë disa nga pankartat që përfaqësuesit e bizneseve po mbanin në duar derisa po protestonin para objektit të Qeverisë së Kosovës për t’i kundërshtuar masat antiCovid-19.
Protestës së gastronomëve u janë bashkuar edhe disa qytetarë të cilët kërkojnë lirimin e dasmave.
Kryetari i Odës së Hotelerisë dhe Turizmit,Hysen Sogojeva, tha se kanë 20 muaj mbyllur dhe ka shtuar se për këtë i janë drejtuar edhe ekzekutivit por nuk janë përgjigjjur.
“Pothuajse janë 20 muaj që me të gjithë bashkëpunëtorët e kemi ngritur zërin për kërkesat si përfaqësues të bizneseve. Për t’i shmangur protestat shumë herë i jemi drejtuar qeverisë por kemi hasur në vesh të shurdhër. Sot jemi këtu për t’i kundërshtuar masat e fundit.
Derisa pushtetarët po mbajnë darka lame e duke mbajtur tubime politike, edhe ne duhet të kemi. Edhe pse jemi në përparësi në procesin e vaksinimit, pothuajse jemi të imunizuar por kjo nuk ka ndikuar fare”,-ka thënë ai.
Ndërsa Kryetari i Shoqatës së Gastronomëve,Petrit Kllokoqi para protestuesve teksa tha se duan të dëshmojnë që janë të punës e jo të dhunës,shtoi se nuk do të ndalen së protestuari e kjo protestë nuk do të jetë e qetë.
Ata kanë bërë të ditur se kërkojnë zgjatjen e orarit deri në orën 1 pas mesnate, mbajtjen e dasmave, të shtyhen afatet e pagesave të kredive.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
