Edhe pse është vetëm 18 vjeç, Xhud Belingham bën të flitet për të për atë që jep në fushë dhe jashtë saj. Pas humbjes 2-3 që Borusia Dortmund pësoi ndaj Bajernit, duke mbetur 4 pikë pas kreut, lojtari anglez ka marrë vëmendjen mediatike për një rekord që regjistroi në këtë ndeshje, por edhe për polemikat ndaj arbitrit Feliks Zvajer, që sipas tij, u dha një penallti shumë bujare bavarezëve, duke vendosur ndeshjen, ndoshta edhe kampionatin.
Në 2005-ën, kur Belingham ishte vetëm 2 vjeç, Zvajer ishte një nga dëshmitarët kyç kundër Robert Hojzer, arbitrit (më pas u dënua) që kishte manipuluar disa ndeshje. Në atë kohë Zvajer u pezullua për 6 muaj, sepse kishte pranuar 300 euro nga kolegu i tij.
Në atë kohë Zvajer u dënua, sepse jo vetëm nuk e denoncoi arbitrin Hojzer, por edhe e ndihmoi atë në rolin e anësorit të favorizonte Vupertaler SV në një ndeshje ndaj skuadrës së dytë të Verder Bremenit. Sapo përfundoi dënimin, Zvajer u bë arbitër ndërkombëtar, pasi për mediet dhe deferatën, ai ishte rehabilituar. Me sa duket, jo në sytë e të gjithëve.
Pas ndeshjes Borusia-Bajern, Belingham drejtoi gishtin ndaj tij: “Për mua nuk ëhstë një penallti, por janë edhe shumë vendime të tjera gjatë ndeshjes shumë të diskutueshme. Por çfarë mund të presësh, nëse i jep sfidën më të rëndësishme të Bundesligës një arbitri, që në të kaluarën ka manipuluar disa ndeshje?”
Edhe sulmuesi i Borusias, Haland, ishte në këtë linjë: “Arbitrimi ishte skandaloz, Zvajer ishte shumë arrogant dhe nuk dua të flas më shumë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
