Dy portierët e Kombëtares, Erit Berisha dhe Tomas Strakosha, vazhdojnë të ngrohin stoli te klubet e tyre. Edhe pse ndeshjet janë më të ngjeshura në këtë periudhë, ata sërish nuk kanë gjetur hapësirë.
Berisha nuk preferohet nga trajneri Juriç si titullar. Ai ishte spektator edhe në ndeshjen e sotme ndaj Empolit, ku Torino barazoi 2-2. Nga lojtarët shqiptarë në këtë ndeshje u aktivizua vetëm Bajrami pak minuta pas nisjes së pjesës së dytë. Ismajli dhe Asllani, dy lojtarët e tjetër kuqezi të Empolit, qëndruan gjithë kohën në stol.
Edhe Tomas Strakosha nuk po arrin të luajë titullar në kampionat me Lacion, edhe pse Reina po “zhdëpet” me gola dhe për të ka pasur jo pak kritika. Edhe sot Lacio pësoi 4 gola në “Olimpico” nga Udineze, në një ndeshje rokamboleske, që përfundoi me rezultatin 4-4. Lacio udhëhiqte 4-3 deri në minutën e 99-të, kur u barazua dhe humbi 2 pikë .
Elseid Hysaj ishte në fushë nga minuta e parë. Mbrojtësi kuqezi ka besimin e trajnerit Mauricio Sarri, i cili po e aktivizon në krahun e majtë. Hysaj është nga të paktët lojtarë shqiptarë të Serisë A që po luan rregullisht për momentin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
