“France Football” nuk e përjashton mundësinë e dhënies së “Topit të Artë 2020” për Robert Levandovskin. Polemikat e mëdha që shkaktoi fitimi i çmimit prestigjioz nga Lionel Mesi pak ditë më parë, duket se i kanë bërë drejtuesit e revistës franceze të reflektojnë.
Në vitin 2020 “Topi i Artë” nuk u dha për shkak të pandemisë. “Nuk duhet të marrim vendime të nxituara. Mund ta rimendojmë, por në të njëjtën kohë duhet të respektojmë historinë e trofeut, që bazohet te votat”, – ka thënë Paskal Ferré, kryeredaktor i “France Football” për portalin ‘Watson’.
Më pas, duke iu referuar edhe deklaratës së Mesit gjatë ceremonisë, ku argjentinasi u shpreh se edhe Levandovski e meritonte trofeun, drejtuesi i “France Football” shtoi: “Ajo që tha Mesi ishte e lezetshme dhe inteligjente”.
Vitin e kaluar Levandovski ishte favorit absolut për fitimin e trofeut, kurse këtë vit polaku doli i dyti, pas Mesit. “Nuk vura Mesin në vend të parë, zgjodha të parin Levandovskin, por mendoj se edhe Mesi e ka merituar “Topin e Artë”, – ka shtuar Ferré. Duhet pranuar se kritikat e shumta pas ceremonisë së fundit, që shkuan deri në akuza për vjedhje dhe skandal, kanë pasur ndikim te prestigjiozja franceze.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
