Me një njoftim të shkurtër dhe shumë të thatë në faqen e vet zyrtare, klubi i Egnatias ka bërë të ditur publikisht largimin e trajnerit Gugash Magani. Një lëvizje e papritur kjo, duke marrë në konsideratë paraqitjen e skuadrës rrogozhinase në këtë kampionat, ku ajo është debutuese në elitë.
“KF Egnatia falënderon trajnerin Gugash Magani për bashkëpunimin. Klubi dhe trajneri vendosin të ndërpresin bashkëpunimin me konsesus. I urojmë suksese në vijim trajnerit Magani”, – shkruhet në njoftimin e Egnatias. Zyrtarisht është një largim me konsensus, por që lë prapa shumë dyshime.
Nuk është e qartë, nëse realisht kemi të bëjmë me një shkarkim, apo me një dorëheqje të trajnerit peqinas. Nëse Magani ka kërkuar largimin, mund të quhet e pranueshme, nëse është shkarkim, sigurisht që është një vendim shumë i nxitur, sepse shumëzohen me zero pikët që Egnatia i ka marrë Tiranës, Partizanit, Laçit dhe Dinamos, si dhe kualifikimi historik në çerekfinale të Kupës së Shqipërisë.
Magani është trajneri i tretë në Superiore që lë detyrën, pas malazezit Vukiçeviç te Laçi dhe Edi Martinit te Teuta. Pas 10 javësh, Egnatia mban vendin e tetë në klasifikim.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
