Dy të rinjtë që shoqëronin Aldi Ramën, kur vrau nënkomisarin e policisë Saimir Hoxha në Lezhë, do të qëndrojnë në burg pa afat.
Gjykata e Apelit në Shkodër la në fuqi vendimin e Gjykatës së Shkallës së Parë në Lezhë, duke rrëzuar kërkesën e Armando Markut dhe Kristjan Sherrit të cilët kërkonin një masë më të butë.
Ndaj dy të rinjve është ngritur akuza “moskallëzim krimi”, pasi të martën e 28 Shtatorit, kur u vra oficeri Saimir Hoxha, ata ndodheshin në makinë me autorin e krimit, 21-vjeçarin Aldi Rama.
Iqtë e këtij të fundit, Kristian Sheri dhe Armando Marku iu bindën urdhrit të policisë për kontroll dhe zbritën nga automjeti, ndërsa Rama nuk e bëri një gjë të tillë.
“Nuk jam për t’u kontrolluar”, - iu drejtua ai nënkomisarit Saimir Hoxha dhe e qëlloi menjëherë pa paralajmërim, ndërsa ky i fundit gjeti vdekjen pak çaste më vonë.
Pasi qëlloi me dy plumba efektivin, 21-vjeçari u arratis me automjet. Ai u gjet pas disa orësh, i plagosur në gjendje të rëndë në një zonë të izoluar, ku dyshohet se qëlloi veten me armën e zjarrit. Aldi Rama humbi jetën në spitalin e Traumës. Ndërsa oficeri Saimir Hoxha u shpall Dëshmor i Atdheut.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.