Kombëtarja jonë është përballur me mungesa të papritura para ndeshjes vendimtare me Poloninë, ku luhet vendi i dytë në grup, që të çon në “Play-off”. Pas Gjimshitit të dëmtuar dhe Çekiçit të skualifikuar, Covid-19 ka ndalur edhe Cikalleshin dhe Gjasulën. Janë shumë mungesa për një skuadër të vogël si Shqipëria në një ndeshje kaq delikate.
Altin Rraklli, ish-sulmues i Kombëtares, pohon për “Gazeta Si” se mungesa e Gjasulës është shumë e dhimbshme. Megjithatë, ai thekson se ndeshja me Poloninë është nga ato ku duhet rrezikuar për fitoren dhe ku rolet e lojtarëve mund të ndryshojnë. “Shumë mungesa? Po vij vetë, po marr edhe Bushin dhe Lalën”, – thotë në fillim me humor ish-lojtari i Kombëtares.
Më pas, Rraklli flet me detaje për ndeshjen dhe skuadrën tonë: “Mungesa e fundit e Gjasulës është shumë e dhimbshme, është një lojtar shumë i rëndësishëm. Gjasula është stabilizator i fazës mbrojtëse dhe iniciatori i organizimit të fazës sulmuese. Shumë luftarak në tokë dhe në ajër. Në dyluftime është shumë mirë, ndaj dhe them se na prish shumë punë. Cikalleshi gjithashtu”.
A kemi shanse për fitore me gjithë këto mungesa? Rraklli përgjigjet: “Shanset janë gjithmonë, sepse mund të manovrojmë mendoj. Trajneri Reja i njeh mirë lojtarët tashmë dhe do të bëjë zgjedhjen e duhur. Na duhet të rrezikojmë për të marrë 3 pikët. Mendoj se kjo është një ndeshje, ku edhe një mbrojtës mund ta fusësh sulmues dhe anasjelltas, sepse në fund, përveç anës e vendosjes tekniko-taktike, një rol vendimtar do të ketë motivimi, dëshira, nervi dhe lufta e secilit.
Prandaj them që edhe rolet në një ndeshje të tillë edhe mund të ndryshohen. Me pak fjalë, skuadra duhet tëe funksionojë e tëra në kompleks dhe të lodhet shumë këtë ndeshje, nëse duam ta fitojmë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
