Klaus Gjasula nuk do të luajë në ndeshjen e sotme me Poloninë, pasi është infektuar edhe ai nga Covid-19. Një tjetër goditje e fortë kjo për trajnerin Edi Reja dhe kuqezinjtë para një ndeshjeje kaq të rëndësishme për kualifikimin e mundshëm në Botërorin e Katarit.
Lajmi është konfirmuar nga Federata Shqiptare e Futbollit. Mungesa e mesfushorit prish shumë punë për stafin teknik të Kombëtares, pasi bëhet fjalë për një nga titullarët më të rëndësishëm dhe më në formë.
Më parë kanë dalë pozitivë në testet e Covid-19 mbrojtësi Erjon Hoxhallari, fizioterapisti Arzen Voci dhe sulmuesi Sokol Cikalleshi. Mungesa e Gjasulës prish shumë ekuilibra, sepse trajneri Reja në pozicion e tij ka zgjedhje shumë të kufizuara, duke qenë se mungojnë edhe Abrashi e Laçi. Alternativa për mesfushën janë Çokaj dhe Ramadani, por ka gjasa që trajneri italian të bëjë ndonjë modifikim.
Bëhen 4 kështu mungesat për ndeshjen me Poloninë, ku trajneri Reja nuk ka gati Cikalleshin, Gjimshitin, Cekicin dhe Gjasulën, shumë për një Kombetare si e jona.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
