Shqipëria U-21, e drejtuar nga Alban Bushi, ka marrë sot fitoren e dytë në Grupin G të kualifikueseve të Europianit. Kuqezinjtë e vegjël kanë mundur sërish Andorrën, këtë herë 2-0 në “Elbasan Arena”, duke shkuar në kuotën e 6 pikëve pas 3 ndeshjesh. Të gjitha pikët janë marrë ndaj të njëjtit kundërshtar, Andorrës, ndërkohë që humbja është regjistruar ndaj Çekisë në transfertë.
Njeriu i ndeshjes ishte pa dyshim Ernest Muçi, autori i dy golave për Shqipërinë, si dhe protagonist i një penalltie të humbur. Sulmuesi i Legias i shënoi të dy golat me goditje dënimi, por nuk mundi të mposhtte portierin kundërshtar nga pika e 11-metërshit. Kuqezinjtë e dominuan ndeshjen, por shpërdoruan shumë dhe në ndonjë moment ishin edhe pak konfuzë.
Grupi G, ku bën pjesë Shqipëria, kryesohet nga Çekia, që sot mundi 0-1 Kosovën dhe u ngjit në kuotën e 9 pikëve pas 3 ndeshjesh. Kosova ka vetëm 3 pikë në grup, ku fitoren e vetme edhe ajo e ka ndaj Andorrës.
Shqipëri-Andorra 2-0
Shqipëria: Tafas, Marku, Selmani, Pëllumbi, Ndrecka, Asllani, Karrica, Çelhaka, Dobra, Muçi, Cara, Trajner: Alban Bushi
Andorra: Himenez, Gerrero, Vales, Trave, Ines, Pubil, Izkuierdo, Myler, Planes, Garsia, Ubaç. Trajner: Eloi Kasals
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
