.png)
Futja e gjuhës angleze në klasë të parë ka krijuar një situatë jo të qartë për të gjithë. Duke llogaritur moshën delikate, kalimin nga lojërat e kopshtit tek mësimet në klasë të parë apo edhe ndikimi që ka pasur pandemia tek fëmijët, sa të gatshëm janë ata për të mësuar anglisht që në klasë të parë?
“Gjuha e huaj ka shumë avantazhe pasi i nxit fëmijëve aftësinë e të komunikuarit, rrit fleksibilitetin e të menduarit, përqasjen ndaj kulturave të ndryshme apo gjërave ndryshe, por e gjitha kjo vetëm nëse realizohet përmes metodologjisë së duhur”, thotë sociologe Marsida Simo e cila shton se në këtë rast është shumë e preferuar metoda “mësojmë përmes argëtimit”.
Nisur nga kjo, Simo ngre disa pyetje: A janë marrë të gjitha masat në një kohë fare të shkurtër të këtij vendimi? Si janë tekstet dhe a janë përshtatur ato me moshën e fëmijës? A janë bërë studime se si do të pritet në zonat urbane por edhe ato rurale? Cila do të jetë metoda e përdorur?
Simo thotë për Gazetasi.al se përgjithësisht klasa e parë është mosha ku tek një pjesë e fëmijëve evidentohen problematika të ndryshme nga mësuesit (gjë të cilat prindi nuk është ekspert t'i kuptojë ose pret të përmirësohen) të tilla si disleksia, hiperaktiviteti etj. Në këtë mënyrë shtohen vështirësitë dhe ngarkesa për fëmijët.
“Ne ende nuk kemi zgjidhur problemet me tekstet e abetares ku vetë mësuesit dhe prindërit kanë hasur vështirësi. Të gjitha këto mund të sjellin thellimin e fenomeneve si analfabetizmi funksional”, thotë Simo.
Simo është e bindur se futja e anglishtes në klasë të parëështëe përshpejtuar dhe minimalisht duhej të bëhej si program pilot përpara se të shtrihej në të gjitha shkollat e vendit.
Një eksperte tjetër që është kundër anglishtes në klasë të parë është edhe psikologia Entela Binjaku e cila thotë për Gazetasi.al se nxënësit janë mjaft të ngarkuar sidomos në tremujorin e parë të shkollës. “Janë tepër të ngarkuar me abetaren dhe me matematikën për t´u shtuar dhe anglishten”, thotë ajo. Binjaku shton se një problem i madh do të shfaqej dhe në momentin që këta fëmijë do të shkonin në klasë të tretë pasi “në klasën e tretë nxënësit nisin një gjuhë të tjetër të huaj, gjuhë që zgjidhet me short zakonisht nga shkollat”.
“Pra çfarë do të ndodhë me këtë anglishte që nis në klasën e parë nëse në klasën e tretë nxënësi nis një gjuhë tjetër?Sërish nxënësit shqiptarë në klasën e gjashtë kanë dy gjuhë në program dhe aty njëra është anglishtja, ndaj cila është arsyeja që kjo gjuhë të nisë që 6 apo 7 vjeç? Çfarë është menduar për nxënësit e shkollave rurale? Po ata që nuk kanë pasur mundësi të ndjekin edhe parashkollorin, apo që nuk kanë frekuentuar kopshtet? Si do të veprohet me klasat që kanë shumë nxënës? Po ata që janë në klasa kolektive?”, ngre disa pyetje psikologia.
“Një element që mendoj se e përforcon qëndrimin tim kundër është edhe një fakt që po e vëmë re shumë shpesh tek 6-7-vjeçarët shqiptarë: mjaft prej tyre janë të ndikuar nga Youtube dhe kur flasin kanë
shumë fjalë anglisht në fjalor”, thotë ajo, ndërsa mendon se ndoshta do të ishte më mirë që t´i mëshohej mësimit më të mirë të gjuhës amtare?
Binjaku tregon se “epidemia” e mësimit të gjuhës së huaj që në vegjëli në vendin tonë është e njohur dhe e lidhur me faktin se prindërit nuk kanë mundësi ta ndjekin fëmijën në këtë rrugëtim. Por shkolla e ka një përvojë.
Gjithsesi Binjaku thotë se kjo praktikë duhet të bëhet siç duhet dhe jo “të hyjmë në diçka të re të cilën nuk dihet sesi është argumentuar apo ku është testuar si projekt pilot”.
Një alternativë e mirë - sipas psikologes - do të ishte futja e anglishtes si orë dëgjimore, si lojëra, argëtim e jo si ngarkesë mësimore në vetvete.
Kjo do të ndihmonte duke llogaritur dhe periudhën e pandemisë që fëmijët e përjetuan shumë.
Binjaku thotë se duke qenë se fëmijët që do të nisin klasën e parë, në dallim nga shumë paraardhës të tyre, vijnë nga një përvojë e pazakontë që lidhet me izolimin nga bashkëmoshatarët, karantinimin e familjeve, distancës sociale, pasigurisë nga e panjohura dhe pasigurisë për t´u njohur me tjetrin etj.; vetë periudha e re në të cilën hyjnë mbart për ta të panjohura dhe ngarkesë emocionale dhe psikologjike.
“Është ngarkesë e madhe psikologjike për fëmijët që përveç çdo gjëje tjetër që do të mësojnë në klasë të parë, të merren dhe me një gjuhë të huaj”, përfundon Binjaku.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
