Qeveria e Kosovës ka ashpërsuar masat kundër koronavirusit, duke theksuar se situata epidemiologjike në vend është rënduar.
Në masat e reja përfshihet kufizimi i lëvizjes së qytetarëve nga ora 22:00 deri në ora 05:00. Orari i sektorit të bar-restoranteve është reduktuar për një orë dhe ky sektor tashmë do të mund të punojë deri në orën 21:30 dhe do të lejohet të punojë vetëm në hapësira të jashtme.
Po ashtu, të gjith personat që do të hyjnë në Kosovë, pavarësisht shtetësisë, duhet të ofrojnë dëshmi për vaksinim apo teste PCR dhe antigen ose në të kundërtën duhet të izolohen për shtatë ditë.
Masat pritet të hyjnë në fuqi të dielën, pas publikimit të vendimit. Qeveria vendosi që viti i ri shkollor të nisë më 13 shtator. Sipas ministrit të Shëndetësisë, Arben Vitia kjo grupmoshë së fundmi është bërë edhe shpërndarës i variantit Delta të koronavirusit.
Sipas ministrit Vitia, situata epidemiologjike në javët e fundit ka qenë e rëndë.
“Situata paraqet një ngritje të madhe të rasteve të infektimit me COVID-19”, tha Vitia.
Institucionet publike dhe private janë të detyruara të punojnë vetëm me staf thelbësor deri më 13 shtator. Pas kësaj date, punëtorët e sektorit publik duhet të dëshmojnë certifikatën e vaksinimit apo testet përkatëse që t’iu lejohet hyrja në vendet e punës.
“Kjo masë gradualisht do të përfshijë edhe sfera të tjera të jetës ekonomike dhe sociale”, tha Vitia.
Javëve të fundit, pandemina është përkeqësuar në Kosovë. Vetëm gjatë të shtunës, Kosova regjistroi 18 viktima dhe 1.891 raste të reja me koronavirus. Ndërkaq, në shtatë ditët e fundit, në vend janë regjistruar 107 viktima dhe 13.475 raste të reja.
Si pasojë e rritjes së rasteve, spitalet dhe klinikat që trajtojnë pacientët me COVID-19 janë tejmbushur.
Sipas raportit të publikuar më 28 gusht, Shërbimi Spitalor dhe Klinik Universitar tha se 1.077 pacientë me koronavirus janë duke u trajtuar në spital, ku 63 prej tyre janë në kujdes intensiv.
Ndërkaq, 944 pacientë po trajtohen me oksigjen.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
