Ka një numër të konsiderueshëm të mësuesve në Kosovë, të cilët nuk janë vaksinuar. Por për të nisur procesin mësimor fizikisht në shtator duhet të plotësohen edhe parakushtet për vaksinim, kështu tha në një deklaratë për Ekonominë Online ministrja e Arsimit, Shkencës, Teknologjisë dhe Inovacionit (MASHTI), Arbërie Nagavci.
“Në po planifikojmë dhe po shpresojmë që viti i ri shkollor do të jetë me pjesëmarrje fizike të nxënësve në shkolla, që nënkupton se duhet të plotësohen edhe parakushtet për vaksinim. Është mirë që kemi vaksina të mjaftueshme, janë të aprovuara dhe besoj do kemi numrin e rifreskuar të mësimdhënësve të vaksinuar dhe shpresoj që në këtë rritje të numrave të dy ditëve të fundit të personave që janë vaksinuar të jetë një numër i konsiderueshëm i mësimdhënësve”, tha Nagavci.
Sipas saj, është një neglizhencë e mësimdhënësve si pasojë e një përfundimi jo të lehtë të mësimit dhe shfrytëzimi i tyre për pushime, por që tash që jemi para fillimit të vitit shkollor, duhet shfrytëzuar mundësia e vaksinimit.
“Unë dëshiroj të besoj që ndoshta nuk është shumë hezitim, më shumë është një neglizhencë e mësimdhënësve, një numër të tyre, të cilët pas përfundimit të një viti shkollor jo shumë të lehtë e me sfida, ndoshta e kanë shfrytëzuar këtë kohë të pushimit duke planifikuar që tash kur jemi para fillimit të vitit shkollor, pra ata që akoma nuk janë vaksinuar të bëjnë vaksinimin në dy dozat, në mënyrë që të jemi të gatshëm për fillimin e vitit të ri shkollor”, tha Nagavci.
Mes të tjerash, ministrja theksoi se është e nevojshme të jemi të përgatitur me të gjitha kushtet për një kujdes të shëndetit publik dhe se janë pikërisht mësimdhënësit ata që duhet të japin një shembull të tillë.
“Është mirë që të jemi të parapërgatitur dhe t’i plotësojmë të gjitha parakushtet për një kujdes për shëndetin publik, tash kemi praktikat e vendeve të rajonit, të cilat me njëfarë forme e kanë ndaluar ambientet e mbyllura ku ka persona që nuk janë vaksinuar, kështu që unë besoj mësimdhënësit që promovojnë shkencën do të jenë një shembull i mirë për të tjerët”, përfundoi Nagavci.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
