.png)
Gjykata Kushtetuese ka pranuar kërkesën e Avokatit të Popullit dhe Komitetit Shqiptar të Helsinkit, duke rrëzuar nenin për përgjimin e qytetarëve nga policia pa autorizimin e Prokurorisë dhe Gjykatës.
Pra, pa marrë lejen e këtyre dy institucioneve, policia nuk mund të kryejë përgjime ndaj qytetarëve, ndërsa Gjykata ka vlerësuar se ky nen është i papajtueshëm me Kushtetutën.
Në seancën e zhvilluar në datë 1 korrik, përfaqësuesit e Kuvendit në Gjykatën Kushtetuese, argumentuan se ndryshimet u miratuan në funksion të parandalimit të veprave penale.
Por Kushtetuesja u shpreh qartë këtë të hënë, kur theksoi se “ligji vendos kufizim të së drejtës kushtetuese të jetës private, duke prekur njëherazi edhe parimin e sigurisë juridike në drejtim të saktësisë së ligjit dhe koherencës së rendit juridik”.
Për këto arsye, Gjykata Kushtetuese vendosi pranimin e kërkesave dhe rrëzimin e nenit që u ndryshua në ligjin për Policinë e Shtetit. Miratimi i ligjit u shoqërua me debate të forta dhe akuza nga opozita, ndërsa tashmë është shfuqizuar.
Sipas njoftimit të Gjykatës Kushtetuese, vendimi përfundimtar i arsyetuar do të shpallet brenda afateve të parashikuara nga ligji.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
