Ekonomia shqiptare u rrit me 5,53% në tremujorin e parë të vitit krhasuar me të njëjtën periudhë të një viti më parë.
Sipas të dhënave të INSTAT, rritjen më të madhe ndër degët e ekonomisë për këtë tremujor e ka shënuar Aktiviteti i Industrisë,Energjisë dhe Ujit i cili është rritur me 23.81% krahasuar me të njëjtën periudhë të vitit më parë.
Ai ndiqet nga grupi i Aktiviteteve Financiare që ka shënuar rritje me 16.94% dhe nga ndërtimi i cili është rritur me 16.87% krahasimisht më të njëjtën periudhë të vitit të kaluar.
Degët të cilat kanë kontribuar pozitivisht në rritje janë Industria, Energjia dhe Uji me + 2.56 pikë përqindje, Ndërtimi me +1.09 pikë përqindje, Administrata publike, Arsimi dhe Shëndetësia me + 0,97 pikë përqindje, Aktivitete të pasurive të paluajtshme me +0,58 pikë përqindje.
Kontribut pozitiv gjithashtu kanë dhënë edhe degë të tjera duke përfshirë aktivitetet financiare, aktivitetet e shërbimit,informacionit dhe komunikacionit si dhe bujqësia, blegtoria e peshkimi.
Nga ana tjetër, negativisht kontribuan aktivitetet: Aktivitete profesionale dhe Shërbime administrative me -0,20 pikë përqindje, Tregti, Transport, Akomodim dhe Shërbim ushqimor me – 0,14 pikë përqindje. Taksat Neto mbi produktet kontribuan negativisht me – 0,02 pikë përqindje.
Grupi i cili ka shënuar rënien më të ndjeshme është ai i Aktiviteteve profesionale dhe Shërbimeve Administrative me 3.14% i ndjekur nga Aktivitetet e Transportit, Tregtisë dhe Akomodimit me një rënie prej 0.93%.
Konsumi final i popullatës, i cili përbën peshën kryesore të shpenzimeve në ekonomi u rrit me 1,49% në krahasim me tremujorin e mëparshëm.
Rritje ka ndjerë gjithashtu edhe konsumi final i qeverisë me 5,16 %.
Eksportet e mallrave dhe shërbimeve u rritën me 0,66 %, ndërsa Importet u rritën me 7,55%.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
