Në Kosovë, qendra e vaksinimit “1 Tetori” në Prishtinë, ka pasur një fluks qytetarësh, ku pjesa më e madhe kanë ardhur nga komunat e tjera. Një situatë e tillë, ka shkaktuar radhë të gjata, me qytetarët që janë ankuar të autoritetet shëndetësore.
Ministria e Shëndetësisë ka reaguar për këtë gjë, duke iu kërkuar qytetarëve t’u drejtohen qendrave të vaksinimit në komunat e tyre.
“Grumbullimet e krijuara sot para sallës ‘1 Tetori’, vijnë si pasojë se aty kanë ardhur të vaksinohen qytetarë edhe nga komunat e tjera, përkundër njoftimeve të bëra ditëve të kaluara dhe dje se qytetarët do të vaksinohen në komunën e tyre”, – thotë MSH.
Kjo e fundit sqaron se vaksinimi kundër COVID-19 është një proces dinamik që do të vijojë deri në vaksinimin e të gjitha kategorive sipas planit.
MSH në Kosovë, i lutet qytetarëve që të informohen nga njoftimet e autoriteteve dhe të shmangin grumbullimet para qendrave të vaksinimit, pasi “mundësia e vaksinimit do të jetë e hapur çdo ditë në secilën komunë”.
Në sallën “1 Tetori”, po vijon vaksinimi vetëm për qytetarët e Prishtinës në bazë të rekomandimeve sipas Planit Shtetëror të Vaksinimit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
