Shefi i Organizatës Botërore të Shëndetësisë, Tedros Adhanom Ghebreyesus është shprehur se disa nga kombet më të pasura të botës po pengojnë përpjekjet e agjencisë së tij dhe partnerëve të saj për të marrë vaksinat në vendet më të varfra të botës.
Tedros mori pjesë në një konferencë të përbashkët, virtuale për shtyp, së bashku me Presidentin gjerman Frank-Walter Steinmeier për të folur në lidhje me iniciativën ndërkombëtare të vaksinimit nga OBSH COVAX, e krijuar për të marrë dhe shpërndarë në mënyrë të barabartë vaksinat COVID-19 në të gjithë botën.
Teksa foli nga selia e OBSH-së në Gjenevë, Tedros tha se disa vende me të ardhura të larta po lidhin kontrata me prodhuesit e vaksinave që dëmtojnë marrëveshjet që COVAX ka me të njëjtat kompani, duke ulur numrin e dozave që COVAX mund të blejë.
Shefi i OBSH-së tha se sigurimi i vaksinave të mjaftueshme për t’u ndarë me vendet më të varfra të botës ndihmon të gjithë. “Kjo nuk është çështje bamirësie. Është çështje e epidemiologjisë. Nëse nuk i japim fund pandemisë kudo, nuk do ta përfundojmë askund, ”tha ai.
Tedros tha se është në interes të të gjitha vendeve, duke përfshirë vendet me të ardhura të larta, për të siguruar që punonjësit shëndetësorë, njerëzit e moshuar dhe grupe të tjera në rrezik janë të parët në radhë për vaksinat në të gjithë botën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
