.png)
Një tjetër vrasje ka ndodhur mëngjesin e kësaj të enjteje në Elbasan, ku është ekzekutuar një 50-vjeçar.
Katër autorë të maskuar kanë qëlluar me pistoletë me breshëri ndaj Bujar Çelës, vëllait të Talo Çelës, një emri shumë të njohur në botën e krimit. Ai ka zbritur nga automjeti në ato momente dhe sapo ka hyrë në lokalin djathtas hyrjes në rrugën e Peqinit është qëlluar. 50-vjeçari punonte si taksist pa licencë.
Çela shkonte çdo mëngjes herët te lokali, ku u ekzekutua, që rrinte i hapur 24 orë, dhe priste pasagjerët që vinin nga autobusët e Greqisë.
Mësohet se autorët e kishin ndjekur 50-vjeçarin dhe janë larguar vetëm pasi janë siguruar se ai kishte vdekur. Ndërkohë Policia ka marrë pamjet filmike nga bizneset e zonës teksa janë ngritur disa pika kontrolli.
Vëllai i Bujar Çelës, Talo Cela është një nga personat më të kërkuar në Shqipëri.
Ai u shpall në kërkim për grabitjen e Rinasit në prill të vitit 2019, teksa më pas dyshohet se ishte i përfshirë edhe në vrasjen e vëllezërve Haxhiaj në Durrës.
Sipas informacioneve, prej kohësh grupi kriminal i Rinasit është në kërkim të parave që grabitën në 2019, dhe për këtë kanë filluar përplasjet, ku Talo Çela u kishte lënë për t’i ruajtur vëllezërve Viktor e Besmir Haxhiaj një sasi parash, dhe këta të fundit nuk ja kishin kthyer.
Tashmë Talo Çela është dhe subjekt i OFL, teksa ngjarjet ku ka qenë i implikuar dyshohet se kanë çuar në vrasjen e të vëllait, Bujar Çela, pa asnjë precedent penal, për hakmarrje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
