Ambasada e Shteteve të Bashkuara të Amerikës në Tiranë ka reaguar me anë të një deklarate në lidhje me ndryshimet kushtetuese të ndërmarra nga Kuvendi në seancën e fundit të këtij sesioni.
Në deklaratën e saj, Ambasada e njeh të drejtën e Kuvendit të Shqipërisë për të ndërmarrë nisma të tilla, por shpreh keqardhjen që këtyre ndryshimeve u mungoi konsensusi i plotë politik.
“Ndërkohë që ky vendim ishte brenda kompetencave të Parlamentit, është për të ardhur keq që nuk u ndërmor në të njëjtën frymë në të cilën u arrit 5 qershori”, thuhet në deklaratë.
SHBA u kujton palëve zotimet e tyre, që pavarësisht vendimit të Parlamentit këtë të enjte, do të vazhdonin me dialogun në Këshillin Politik me mirëbesim për të arritur një marrëveshje për hapjen e listave dhe koalicionet.
“E mirëkuptojmë zhgënjimin e Opozitës së Bashkuar dhe mirëpresim vendosmërinë për të vazhduar angazhimin demokratik në institucione dhe procese, përfshirë këtu edhe Këshillin Politik, që mundon që zërat e të gjitha shqiptarëve të dëgjohen. Përsërisim se ne bëjmë përgjegjës udhëheqësit për fjalën e dhënë dhe ashtu siç bënë në marrëveshjen e 5 qershorit ata duhet të tregojnë vullnet dhe aftësi për të negociuar marrëveshje duke vendosur interesat e popullit shqiptar si parësore”, mbyllet reagimi i SHBA.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
