Gjykata e Hagës ka akuzuar për krime lufte presidentin, Hashim Thaçi dhe kreun e Partisë Demokratike të Kosovës, Kadri Veseli me pretendimin se ata dyshohen si përgjegjës për vrasjen e 100 personave.
Pas njoftimit zyrtar, klasa politike e Kosovës po del më një qëndrim të përbashkët se Thaçi dhe Veseli janë të pafajshëm.
Kreu i Lidhjes Demokratike të Kosovës, Isa Mustafa, tha se lufta e Ushtrisë Çlirimtare të Kosovës ishte dhe do të konfirmohet sërish si e drejtë dhe e pastër.
Në një postim të shkurtër në Facebook, Mustafa shkruan se luftëtarët e UÇK-së luftuan për të mbrojtur popullin e Kosovës nga terrori, likuidimi dhe gjenocidi serb.
“Besoj thellë se lufta e UÇK-së Ishte dhe do të konfirmohet nga drejtësia ndërkombëtare si luftë e drejtë dhe pastër, se luftëtarët e UÇK-së luftuan për ta mbrojtur popullin e Kosovës nga terrori, likuidimi dhe gjenocidi serb”.
Më herët reagoi edhe ish-kryeministri Ramush Haradinaj.
“Populli shqiptar i Kosovës me të drejtë zhvilloi luftë për liri, pas shtypjes së egër nga regjimet e ndryshme serbe, që zgjati pothuajse një shekull, duke kulmuar me regjimin e Millosheviqit.
Ushtria Çlirimtare e Kosovës ka bërë luftë të pastër, rezultat i së cilës ishte liria dhe themelimi i Republikës së Kosovës.
Ne besojmë në pafajësinë e Presidentit Thaçi, kryetarit Veseli dhe të gjithë bashkëluftetarëve të tjerë”, shkruan Haradinaj në Facebook.
Ka reaguar edhe Albin Kurti.
“E di që lufta çlirimtare është luftë e drejt është luftë kundër një agresori dhe okupatori i cili kishte kryer gjenocid në vendin tonë dhe se luftëtarët e lirisë, veteranët e invalidët e UCK edhe politikisht edhe historikisht janë në të drejtën e tyre dhe tonën. Nuk do mend se kjo ngritje e aktakuzës dëmton reputacionin e Kosovës në arenën ndërkombëtare dhe një takim i tillë nuk mund të ishte në rrethanat e tyre”, tha Kurti.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
