Nis hedhja e rasatëve të koranit në Liqenin e Ohrit. Për herë të parë këtë vit do të hidhen mbi 1.5 milion rasate që sipas Ministrisë së Bujqësisë është numri më i madh i prodhuar ndonjëherë në Shqipëri.
“Për herë të parë në historinë e këtij liqeni, sivjet do të hedhim një milion e gjysmë rasat korani. Është një sasi gati dyfish nga sasitë e hedhura ndër vite, madje edhe shumë më shumë sesa sasia që hedh pala maqedonase. Ne aktualisht kemi një qendër moderne të rritjes së rasatit që kontribuon në mënyrë shumë të rëndësishme në kultivimin e koranit, si peshku unik që rritet vetëm në Liqenin e Ohrit”, tha ministri Çuçi në Liqenin e Ohrit.
Sipas Çuçit, kjo është e vetmja mënyrë për të ruajtur këtë pasuri jo vetëm tonën, por të të gjithë botës pasi siç dihet ky liqen është futur këtë vit edhe në mbrojtjen e UNESCO-s.
“Bashkë me kryetarin e bashkisë ramë dakord që së bashku të krijojmë qendrën e organizatës së peshkimit dhe të kontribuojmë për ndërtimin e disa moleve në funksion të peshkimit. Besoj se vitin tjetër do t’i kemi gati këto mole. Kjo do të krijojë një lehtësi shumë të madhe për peshkatarët”, u shpreh ministri Çuçi.
Procesi i hedhjes së rasatit të koranit do të vijojë përgjatë gjithë muajit tetor. Ripopullimi me rasate të koranit, të kësaj specieje endemike të liqenit të Ohrit, është një mbështetje e qeverisë shqiptare për peshkimin në Pogradec si dhe mbrojtjes së biodiversitetit. Prodhimi i rasatit bëhet në qendrën moderne të rritjes pranë fshatit Lin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
