Zbardhet dëshmia e 33-vjeçarit Mihal Thimjo që vrau me sende të forta ortakun e tij, Gëzim Saraçi 57 vjeç, teksa udhëtonin në kamionçinën e këtij të fundit në fshatin Zagori të Gjirokastrës.
Përpara policisë, Thimjo ka deklaruar që Saraçi e ka sharë dhe ofenduar, madje e ka goditur i pari.
“Më shau, më ofendoi, më tha keni bërë me shumë lekë se ne. Ti ke vilë trekatëshe, unë nuk kam. I thashë mos më sha, nuk dëgjoi dhe më qëlloi”, është shprehur ai në polici.
Ngjarja
Një konflikt i çastit ka degjeneruar në përdorim të sendeve të forta dhe i ka marrë jetën një 57-vjeçari në fshatin Zagori të Gjirokastrës. Mihal Thimjo 33 vjeç dhe Gëzim Saraçi 57 vjeç kanë qenë duke udhëtuar me një kamionçinë në aksin rrugor rural Polican-Suhë dhe në ecje e sipër janë konfliktuar për motive të dobëta.
Ata janë përleshur me njëri-tjetrin dhe 33-vjeçari ka goditur me levë Gëzim Saraçin, duke e lënë të vdekur. Pas vrasjes autori Mihal Thimjo ka telefonuar familjarët e tij dhe iu ka thënë se e kishin qëlluar. Kanë qenë familjarët e autorit ata që kanë shkuar të parët në vendngjarje dhe kanë gjetur trupin e pajetë të Saraçit, por asnjë gjurmë të të afërmit të tyre.
Autori, i cili ishte edhe vetë i plagosur u largua nga vendi i ngjarjes, por u kap nga policia pas 6 orë kërkimesh pranë lagjes së njohur si “Blloku i furrave”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
