Gazeta Si – Pas thuajse 14 muajsh, Prokuroria e Elbasanit është rikthyer në vendin ku u vra Pjerin Xhuvani gjatë fushatës elektorale për zgjedhjet e 25 prillit 2021.
Prokurorët kanë rindërtuar edhe një herë skenën e krimit, ku u ekzekutua aktivisti i PS dhe mbetën të plagosur tre persona të tjerë.
Burime bëjnë me dije se një grup hetimor ka rindërtuar skenën e krimit, me qëllim për të pasur një panoramë të qartë të asaj që ndodhi vetëm disa ditë përpara zgjedhjeve parlamentare të një viti më parë.
Policia kishte rrethuar zonën me shirita sigurie, ndërsa prokurori i çështjes Ridvan Suka ndodhet në krye të hetimeve.
Kjo është hera e parë që grupi hetimor ka zbritur në terren dhe po inskenon të gjithë ngjarjen. Është bërë mbyllja e rrugës dhe nuk lejohet lëvizja e makinave.
Për ngjarjen, vijon të mbetet në burg si autor i dyshuar ish-efektivi i RENEA-s, shoqëruesi i Gazment Bardhit, Arbër Paplekaj.
Paplekaj akuzohet për kryerjen e veprave penale, “Vrasja në rrethana të tjera cilësuese kundër dy ose më shumë personave dhe në mënyrë të rrezikshme për jetën e shumë personave”, “Vrasja e punonjësve të Policisë së Shtetit, e mbetur në tentativë”, “Heqja e paligjshme e lirisë e kryer me dhunë” në bashkëpunim.
Ngjarja e rëndë ndodhi në lagjen “5 Maj” në Elbasan. Nga shkëmbimi i zjarrit mbeti i vrarë aktivisti i PS-së për Elbasanin, Pjerin Xhuvani.
Në këtë përplasje, mbeti e plagosur punonjësja e policisë, Xhensila Sota dhe dy persona të tjerë.
Sipas policisë, përplasja me armë ndodhi për shkak të dyshimeve të shtabit elektoral të PD, se një makinë e shtabit të PS-së po shpërndante para në këmbim të votave.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
