.png)
Gazeta Si - Shefi i policisë japoneze, Itaru Nakamura, ka njoftuar dorëheqjen e tij, duke marrë përgjegjësinë për vrasjen e ish-kryeministrit Shinzo Abe në korrik gjatë një takimi elektoral në Nara.
Njoftimi i dorëheqjes u dha në një konferencë për shtyp për të bërë një bilanc të hetimit. Në këtë drejtim, gjatë hetimit, dolën shumë mangësi të rëndësishme në masat e sigurisë.
Nakamura është figura e profilit më të lartë që pranon përgjegjësinë dhe rrjedhimisht jep dorëheqjen për shkak të shkeljeve të sigurisë.
Ashtu si ai, edhe shefi i policisë së prefekturës Nara, Onizuka Tomoaki, ka deklaruar se dëshiron të japë dorëheqjen.
Truprojat e Abe nuk ishin në gjendje ta mbronin atë si duhet në 8 korrik. Videoja e marrë në konsideratë nga hetuesit tregon se si kaluan rreth dy sekonda e gjysmë nga gjuajtja e parë e gabuar e armës së zjarrit të punuar me dorë të përdorur nga sulmuesi, por goditja e dytë rezultoi fatale.
“Ndërsa hetimet vazhdojnë për atë që ka ndodhur, ne besojmë se plani ynë i sigurisë duhet të hapë një fazë të re, të fillojë nga e para me mbështetjen e një organizate tjetër”, shpjegoi Nakamura në njoftimin e dorëheqjes së tij.
Qeveria në fakt ka njoftuar se dëshiron të rishikojë planet për operacionet e sigurisë në lidhje me njerëzit e profilit të lartë, duke forcuar përfshirjen e agjencisë së policisë me prefekturat lokale: një ndryshim i tillë rrënjësor nuk është parë në policinë japoneze për 30 vjet.
Nakamura kishte qenë kreu i Agjencisë Kombëtare të Policisë për rreth një vit, pasi iu bashkua trupës në vitin 1986.
Një karrierë që përfshin dekada, gjatë së cilës Nakamura punoi gjithashtu në departamentin e krimit të organizuar.
Abe u qëllua për vdekje gjatë një tubimi elektoral më 8 korrik në rajonin Nara. Vrasësi i tij u ndalua në vendngjarje dhe besohet se kishte shënjestruar Aben, sepse mendonte se ishte i lidhur me Kishën e Unifikimit.
Autori i dyshuar u krimit, Tetsuya Yamagami, po i nënshtrohet një vlerësimi psikiatrik për të përcaktuar gjendjen e tij në kohën e atentatit.
Abe ishte politikani më i njohur i Japonisë dhe kryeministri më jetëgjatë, por siguria ishte relativisht e ulët derisa ai mbajti një fjalim në një rrugë në rajonin perëndimor.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
