.png)
Gazeta Si - Policia e Tiranës ka zbardhur vjedhjen e rreth 220 mijë eurove që po transportoheshin nga një taksist, ngjarje e ndodhur më 4 tetor në kryeqytet.
Në një njoftim zyrtar për mediat, policia thotë se ka mundur të identifikojë 4 autorët e dyshuar, të gjithë gjeorgjianë. Ata janë shpallur në kërkim dhe bëhet fjalë për: Levan Kiria, 30 vjeç; Tengiz Natchkebia, 36 vjeç; Noshrevani Kutalia, 30 vjeç; Yousuf Bozkurt, 31 vjeç.
“Nga veprimet hetimore të kryera në kuadër të këtij operacioni, ka rezultuar se autorë të dyshuar të kësaj vjedhje janë shtetasit L. K., 30 vjeç, T. N., 36 vjeç, N. K., 30 vjeç, dhe Y. B., 31 vjeç, me shtetësi gjeorgjiane, për të cilët po punohet për kapjen dhe arrestimin e tyre. Në cilësinë e provës materiale u sekuestrua një motomjet, si dhe është shpallur në kërkim një automjet që dyshohet se është përdorur gjatë kryerjes së kësaj ngjarje”, thuhet në një njoftim për mediat.
Dyshohet se autorët kanë hyrë në Shqipëri nga Maqedonia e Veriut përmes një makine të marrë me qira. Më pas për të realizuar vjedhjen ata kanë përdorur një motor, të blerë tek po një shtetas i huaj.
Policia po verifikon dhe destinacionin e parave. Kjo pasi ka dyshime se paratë nuk kanë qenë për në bankën e nivelit të dytë, ndryshe nga çfarë u pretendua fillimisht nga taksisti dhe pronarët e "Exchange", ku u mor shuma e konsiderueshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
