.png)
Gazeta Si – Gjykata e Tiranës ka liruar nga burgu nënën lehonë, Diana Bahçen, e cila u arrestua pak ditë pasi lindi djalin e saj, pasi kishte marrë një gjobë prej 250 mijë lekësh që iu konvertua në 50 ditë burg.
Gruaja nga Shkodra, u arrestua për një gjobë të papaguar për braktisjen e fëmijës nga martesa e parë. Seanca e ardhshme lidhur me këtë çështje, do të zhvillohet më 14 prill, në orën 10:00.
Gjykata vendosi këtë të premte pezullimin e ekzekutimit të dënimit me burg për gruan lehonë, derisa të shqyrtohet kërkesa tjetër për shlyerjen e gjobës. Nga ana tjetër, mbrojta merr përsipër që të paguhet gjoba.
LEXO EDHE:
Shkodër / Nga materniteti në burg, arrestohet 8 ditë pas lindjes gruaja lehonë për një gjobë!
Seanca gjyqësore u zhvillua sot në Gjykatën e Tiranës për nënën lehonë nga Shkodra, e cila ishte dënuar me 50 ditë burg për akuzën e braktisjes e fëmijës. Por nga ana e saj, ajo u shpreh se nuk ka qenë në dijeni të gjobës së vënë nga gjykata, ndërkohë deklaroi se nuk e kanë lejuar të takojë vajzën e madhe 5-vjeçare.
Avokatët e saj kërkuan lirimin e menjëhershëm, duke pasur parasysh se fëmija i saj është vetëm pak ditësh dhe kërkojnë përkujdesjen e saj.
Kërkesa për pezullimin e ekzekutimit u gjykua nga gjyqtari Ardit Mustafaj, ndërsa prokurori Endrit Bimi theksoi se duhet të paguhet gjoba prej 25 mijë lekësh.
Diana u dënua me 50 ditë burg për shkak se ish-bashkëshorti i saj e ka akuzuar se ka braktisur fëmijën, por ajo e mohon këtë fakt duke thënë se ai e dhunonte.
Burgosja e nënës së re shkaktoi reagime të forta në opinionin publik, si dhe në politikë, duke kërkuar menjëherë lirimin e saj nga qelia.
“Në 2020 u dënua me 250 mijë lekë gjobë e cila nuk u ekzekutua sepse e pandehura nuk u gjet. Ky vendim u konvertua me dënim 50 ditë. Ky vendim u ekzekutua më 7 mars. Diana sapo kishte lindur një fëmije i cili ishte 10 ditësh. Kemi bërë kërkesë të shtyhet afati i ekzekutimit të vendimit deri sa fëmija të bëhet 1 vjeç. Dhe të pezullohet ekzekutimi. Kemi depozituar kërkesë për rivendosje në afat për të kundërshtuar vendimin e 2020. Kërkoj në emër të fëmijës 20 ditësh lirimin e nënës së saj dhe pezullimin provizor të vendimit”, tha avokati mbrojtës i gruas, Anton Kosteri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
