Ish-kreu i Krimeve të Rënda, Besim Hajdarmataj është shkarkuar nga detyra, duke dalë përfundimisht jashtë sistemit të drejtësisë pas 22 vitesh karrierë.
Ka qenë Komisioni i Pavarur i Apelimit, ai që ka “djegur” karrierën e prokurorit Hajdarmataj, duke e përjashtuar me anë të një vendimi.
KPA vendosi këtë të mërkurë pranimin e kërkesës së ndërkombëtarëve dhe të Komisionerit Publik, duke hedhur poshtë vendimin e mëparshëm të Komisionit të Pavarur të Kualifikimit që e konfirmoi në detyrë.
Hajdarmataj u konfirmua në detyrë më 16 tetor nga trupa e kryesuar nga Brunilda Bekteshi, me relatore Suela Zhegu dhe anëtar Roland Ilia dhe u referua për procedim disiplinor për një hetim të mbyllur të vitit 2010.
Por me rekomandim të Operacionit Ndërkombëtar të Monitorimit, ONM, vendimi u ankimua në Kolegj. Më pas, Komisioneri Publik bëri një ankimin ndaj vendimit të Komisionit për konfirmimin në detyrë të prokurorit.
Komisioneri kërkoi shkarkimin e tij me arsyetimin se subjekti nuk arrin nivel të besueshëm në kriterin e profesionalizmit dhe të pasurisë.
Hajdarmataj u akuzua nga mazhoranca aktuale se ka përgjuar socialistët në Dibër me porosi të ish-kryeministri Berisha, me të ashtuquajturën dosje “339”, për të sgantazhuar qeverinë.
Besim Hajdarmataj e ka filluar karrierën në sistemin e drejtësisë në vitin 1999 dhe përgjatë 22 viteve, ai ka mbajtur poste drejtuese në Prokurorinë e Tropojës dhe të Kurbinit.
Në maj 2015, ai u emërua prokuror në Prokurorinë e Krimeve të Rënda dhe një vit më vonë mori drejtimin e kësaj prokurorie.
Me ardhjen e Arta Markut në krye të Prokurorisë së Përgjithshme, Hajdarmataj u largua fillimisht nga posti i drejtuesit të Krimeve të Rënda dhe në shtator 2018 u komandua në Prokurorinë e Pogradecit.
Ai e konsideroi transferimin të paligjshëm dhe me vendim të Gjykatës Administrative dhe më pas të Këshillit të Lartë të Prokurorisë, u rikthye sërish si prokuror i Krimeve të Rënda.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
