Zbardhet vendimi i Gjykatës që la në burg infermieret dhe sanitaret e përfshira në ryshfete në spitalin Covid 2, “Shefqet Ndroqi”.
Ndërkohë, Gjykata e Tiranës ka kërkuar që të pyeten drejtuesit e këtij spitali dhe personeli i infermierëve se përse në këtë spital Covid lejohet futja e ushqimeve nga jashtë në një kohë që ushqimi duhet të sigurohet nga vetë spitali.
“Në kushtet kur nga Prokuroria pretendohet se ka dyshime për veprën penale të shpërdorimit të detyrës është e domosdoshme pyetja e tyre pasi ka të bëjë me detyrën konkrete të infermiereve nën hetim si dhe të sanitareve që do të thotë, cilat kanë qenë në detyrat e tyre sipas protokollit mjekësor në përputhje me detyrën e secilës, si është bërë ndarja e punës për pacientët e shtuar sipas pavionëve përkatës. Një moment tjetër është fakti se përse është lejuar futja e ushqimeve në këtë spital, kur ushqimi është pjesë e pacientëve nga shërbimi shëndetësor falas, aq më shumë kushtet e pandemisë kur mund të jetë edhe burim i infektimit”, thuhet në vendimin e gjykatës.
Ndër të tjera, Gjykata thotë se duhet pyetur edhe drejtuesi i spitalit “Shefqet Ndroqi” në lidhje me këtë ngjarje.
“Kryerja e këtyre veprimeve hetimore si administrimi i aktit të ekspertimit të mësipërm, marrja e deklarimeve të personelit mjekësor, infermieror, si dhe drejtuesit e Spitalit Shefqet Ndroqi” lidhur me ngjarjen dhe veprimtaritë të cilat do të zbardhin të vërtetën në raport me ngjarjen si dhe veprimet konkrete të personave nën hetim lidhur me veprat penale për të cilat ndryshohen. Dhe fakti nëse ato kanë kryer veprime të cilat lidhen me faktin e mosdhënies së shërbimit në kushtëzim të pagesës apo janë kryer pagesa mbi këto shërbime në kundërshtim me detyrën e tyre si infermierë, ndërsa për personin nën hetim sanitare me veprime që konfigurojnë veprën penale, të mashtrimit”, thuhet në vendimin e Gjykatës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
