5-vjeçari Klodian Hashimi, i denoncuar i zhdukur që prej dy javësh nga familjarët e tij u gjet i pajetë këtë të diel pak metra larg banesës së tij, në zonën e Shkozës në Tiranë.
Trupi i të miturit është gjetur rreth mesditës në një kanal kullues pranë banesave sociale ngjitur me lumin e Lanës, aty ku banon familja e tij.
Policia njofton se ka nisur hetimet për zbardhjen e rrethanave, ndërkohë që paraprakisht dyshohet se bëhet fjalë për një ngjarje aksidentale, ku 5-vjeçari ka kaluar rrjetën e vendosur që ndan zonën e banuar nga lumi dhe ka rënë aksidentalisht në ujë, duke u mbytur.
Familjarë të të miturit fajësojnë strukturat shtetërore. Ata thonë se në e gjithë barriera që është ngritur për të penguar fëmijët që t’i afrohen lumit është e dëmtuar dhe kërkojnë që në vend të telave të ngrihet një mur.
Në zonën në fjalë vazhdojnë punimet për rehabilitimin e bregut të Lumit të Lanës dhe për shkak të punimeve në shumë vende mungojnë barrierat mbrojtëse, sidomos për fëmijët e vegjël.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
