Turqia ndalon protestën për 1 Majin në sheshin kryesor të Stambollit

Policia turke mbylli të martën sheshin qendror Taksim të Stambollit për të parandaluar çdo protestë të 1 Majit, ndërsa Presidenti Rexhep Tajip Erdogan paralajmëroi sindikatat të qëndrojnë larg çdo hapi provokues.

Barriera të larta metalike u ngritën rreth sheshit, raportuan gazetarët e AFP.

Masat e shtuara të sigurisë erdhën një ditë pasi Ministri i Brendshëm Ali Yerlikaya tha se autoritetet kishin caktuar 40 zona për festimet e Ditës së Majit, me përjashtim të sheshit simbolik Taksim.

Yerlikaya tha se disa sindikata kishin kërkuar përdorimin e sheshit, epiqendrën e protestave të vitit 2013 kundër qeverisë së kryeministrit të atëhershëm Rexhep Tajip Erdogan, tani president, por se kjo nuk do të lejohej.

“Sheshi Taksim dhe hapësira rreth tij nuk është e përshtatshme për asnjë tubim”, tha ai.

Partia kryesore opozitare e Turqisë CHP, e cila fitoi shumicën e votave në zgjedhjet lokale të 31 marsit duke mbajtur kontrollin e disa qyteteve kryesore përfshirë Stambollin, i bëri presion qeverisë që të hapte sheshin për mitingjet e punëtorëve.

"Vulosja e Taksimit do të thotë mosnjohje e kushtetutës," tha kryetari i CHP-së Ozgur Ozel.

Në një fjalim të martën, Erdogan bëri me dije se këmbëngulja për organizimin e një mitingu në zona të paautorizuara ishte "me qëllime jo të mira".

“I ftoj sindikatat dhe partitë tona politike që të qëndrojnë larg hapave që do të dëmtonin atmosferën e 1 Majit”, tha ai.

Sheshi Taksim ishte një terren tubimi për festimet e Ditës së Majit deri në vitin 1977, kur të paktën 34 njerëz u vranë gjatë demonstratave.

Autoritetet më vonë hapën sheshin për festime në vitin 2010, por ai u mbyll përsëri në 2013 pasi u organizuan protesta antiqeveritare që synonin rrëzimin e Erdoganit.

Në vitin 2023, gjykata e lartë kushtetuese e Turqisë vendosi se mbyllja e sheshit Taksim për protestat përbënte shkelje të të drejtave. Grupi i të drejtave të Amnesty International tha gjithashtu se ndalimi "bazohet në baza krejtësisht të rreme të sigurisë dhe rendit publik" dhe bëri thirrje që sheshi të hapet.

Duke e quajtur sheshin "një vend me rëndësi të madhe simbolike", Amnesty shtoi se: "Për më shumë se një dekadë, autoritetet turke kanë kufizuar në mënyrë të paligjshme të drejtën e njerëzve për t'u mbledhur dhe kanë kriminalizuar protestat paqësore që zhvillohen në shesh".