.png)
Policia turke u përlesh të premten me demonstruesit që protestuan për të tretën natë radhazi për arrestimin e kryebashkiakut të Stambollit, i cili është një rival politik i presidentit Rexhep Tajip Erdogan.
Oficerët qëlluan me plumba gome dhe sprej piper ndaj protestuesve në Stamboll, ndërsa anëtarët e turmës hodhën flakë të ndezur. Në qytetin perëndimor të Izmirit, policia përdori gaz lotsjellës dhe ujë për të shpërndarë protestuesit ndërsa në Stamboll, njerëzit brohorisnin parulla të tilla si “Qeveri, dorëheqje!”
Ministri i Brendshëm Ali Yerlikaya tha në mediat sociale se rreth 350 persona u arrestuan në demonstratat e së premtes mbrëma.
Kryetari i Bashkisë së Stambollit Ekrem Imamoglu u arrestua herët të mërkurën në një bastisje në rezidencën e tij për lidhje të dyshuara me korrupsionin dhe terrorin.
Arrestimi i Imamoglu erdhi vetëm disa ditë përpara emërimit të tij të pritshëm si kandidat presidencial për Partinë Popullore Republikane (CHP) të opozitës.
Çfarë fshihet pas protestave?
Mbështetësit e tij thonë se arrestimi ishte një përpjekje e motivuar politikisht për të hequr një sfidues popullor të sundimit më shumë se dy dekadash të Erdoganit. Zgjedhjet presidenciale në Turqi janë planifikuar për vitin 2028, por Erdogan do të mund të kandidojë sërish vetëm nëse miratohet një amendament kushtetues ose nëse thirren zgjedhje të parakohshme.
“Ftoj dhjetëra mijëra, qindra dhe miliona të demonstrojnë në mënyrë paqësore, të shprehin reagimin tonë demokratik dhe të ushtrojnë të drejtat kushtetuese,” tha të premten kreu i CHP Ozgur Ozel.
Mijëra njerëz kanë protestuar në qytetet turke që nga arrestimi i Imamoglu. Në Stamboll, Ankara dhe Izmir, shpërthyen përleshjet mes policisë dhe protestuesve. Si përgjigje, autoritetet kanë njoftuar një ndalim pesë-ditor të demonstratave.
“Atyre që thonë se thirrja e njerëzve në rrugë është e papërgjegjshme, unë u them këtë: Nuk jemi ne që i mbushim këto rrugë dhe sheshe. Është paligjshmëria dhe padrejtësitë tuaja që i kanë nxjerrë njerëzit jashtë”, tha kreu i opozitës Ozel.
Si është përgjigjur Erdogan?
Të premten, presidenti Erdogan tha në një fjalim se autoritetet “nuk do të lejojnë që të dëmtohet rendi publik” dhe u zotua se “nuk do t’i dorëzohet vandalizmit apo terrorizmit të rrugës”.
Arrestimi i Imamoglu është pjesë e një goditjeje mujore të opozitës turke.
Sipas prokurorëve, Imamoglu akuzohet se ka keqpërdorur pozitën e tij për përfitime financiare.
Në një hetim tjetër, Imamoglu akuzohet se ka ndihmuar Partinë e Punëtorëve të Kurdistanit (PKK), e konsideruar si organizatë terroriste nga Turqia, Shtetet e Bashkuara dhe vende të tjera, duke pretenduar se ka krijuar një aleancë me grupet kurde për zgjedhjet komunale të Stambollit.
Qeveria e Turqisë ka hedhur poshtë pretendimet për veprime ligjore të motivuara politikisht kundër opozitës, duke këmbëngulur në vend që gjykatat të funksionojnë të pavarura./DW/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
