.png)
Aleksis Tsipras ishte kryeministri i parë grek që vizitoi Maqedoninë e Veriut, pas nënshkrimit të marrëveshjes së Prespës, paktit më të rëndësishëm më Ballkanin Perëndimor pas atij të Dejtonit.
Tani që ndodhet në opozitë, Tsipras duket se dhe ka vendosur të kthehet në vendin fqinj për të folur jo vetëm për prapaskenat e kësaj marrëveshjeje, por edhe për t’i bërë thirrje Bashkimit Europian të hapë negociatat e anëtarësimit me Maqedoninë e Veriut, por pa e përmendur perspektivën evropiane të vendit tonë.
Kreu i Syrizas pati një takim me Kryeministrin e Maqedonisë së Veriut Zoran Zaev të hënën pasdite dhe po merr pjesë në një takim të revistës britanike “The Economist” për Maqedoninë e Veriut.
Në zemër të kësaj konference, e cila po zhvillohet në një atmosferë shumë mikpritëse, ishte Marrëveshja e Prespës, për të cilën Tsipras dhe Zaev argumentuan se është një shembull i zgjidhjes paqësore të konflikteve në Ballkan dhe krijon perspektiva për zhvillimin dhe thellimin e marrëdhënieve midis Greqia dhe Maqedonisë Veriore.
Tsipras deklaroi se ai dhe Zaev "kishin treguar se Ballkani mund të kapërcejë nacionalizmin dhe të tregojë një vizion për të ardhmen".
Ai i dërgoi një mesazh Bashkimit Evropian, duke i bërë thirrje që japë “dritën jeshile” për hapjen e negociatave të pranimit me Maqedoninë e Veriut.
Ish-kryeministri tha sot gjatë konferencës se mendon se Marrëveshja e Prespës është një fitore e diplomacisë mbi nacionalizmin dhe një kontribut për paqen dhe stabilitetin në rajon, diçka për që synon Bashkimi Europian.
“Me këtë pakt- tha ai- Maqedonia e Veriut ka treguar se është një partner i besueshëm i Bashkimit Europian. Në mbledhjen e ardhshme të Këshillit Evropian, BE-ja duhet të caktojë datë për fillimin e negociatave për anëtarësim me Shkupin. Kjo marrëveshje tregon vlerat për të cilën po lufton BE-ja. Kjo marrëveshje riafirmon ambicien e BE për të sjellë paqen dhe stabilitetin në rajon. Maqedonia e Veriut është një shtet që promovon procesin e zgjerimit në kuadër të legjislacionit evropian. Kjo marrëveshje tregon se Maqedonia e Veriut e meriton hapjen e negociatave”, tha Tsipras në fjalimin e tij në hapjen e Samitit të “The Economist” në Shkup
Për më tepër, kreu i SYRIZA-s e përshkroi si një "krim" faktin që çështja e emrit nuk ishte zgjidhur për shumë vite, në një intervistë me stacionin televiziv “Alsat” në Shkup.
"Ishte krim që ne nuk mund të gjenim një kompromis që nga fillimi, një zgjidhje për çështjen e emrit në mënyrë që t'i afrojmë të dy popujt. Ne jemi dy vende fqinje, nuk kemi shumë gjëra që në ndajnë, ne kemi shumë që na bashkojnë. Kështu që do të ishte një krim nëse do të na jepej mundësia pas 25 vjetësh, unë dhe Zoran në vend që të shfrytëzonim atë mundësi, ta zgjidhim problemin, ta hidhnim në plehra. Ky do të ishte një krim. Dhe do të ishte një krim sepse ne po zhytëm Maqedoninë e Veriut, vendin tonë fqinj, në paqëndrueshmëri politike dhe do të shkaktonim zhvillime destabilizuese në rajonin e Ballkanit, dhe të gjithë e dimë se sa i brishtë është rajoni ", tha Tsipras.
Ai gjithashtu tha se negociatat që çuan në Marrëveshjen e Prespës nuk ishin një detyrë e lehtë.
"Mund të jetë e lehtë kur e shihni gjithçka nga jashtë. Shumë njerëz thonë, që në nuk shkuam shumë larg, mjafton të gjenim një emër. Por në të vërtetë pas emrit kishte shumë detaje që duheshin zgjidhur. Çështje që lidhen me trashëgiminë kulturore dhe marrëdhëniet bilaterale”, shpjegoi ish-kryeministri.
Ai zbuloi se pak para se të arrihej kompromisi, të dyja palët ishin gati të dorëzoheshin dhe mendonin se nuk do të mund ta gjenin gjuhën e përbashkët.
“Po, kishte një moment para marrëveshjes përfundimtare, një fundjavë, kur hodhëm lapsat dhe thamë se përfundimisht e kemi të vështirë të gjejmë një gjuhë të përbashkët. Por logjika mbizotëroi. Kjo ndodhi pak para marrëveshjes, disa ditë para nënshkrimit. Ishte fundi i një rrugëtimi të vështirë. Gjithmonë ka lodhje, të dyja palët mendonin se i kanë shkelur vijat e kuqe. Një javë para telefonatës nga Zorani, bëmë disa korrigjime ose lëshime, quajini si të doni. Qe të dy palët, një javë para marrëveshjes hodhëm stilolapsat dhe menduam se nuk do të arrinim marrëveshje”, tha Tsipras. “Bëhet fjalë për marrëveshje të krijuar me kompromis dhe vullnet nga të dyja palët”, përfundoi ish-kryeministri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
