Gazeta si – Zvonimir Boban nuk bën kurrë kompromis me parimet e tij në të mirë të futbollit. Kroati është nga ata që flasin hapur, pa shumë diplomaci. Këtë ka bërë edhe së fundi, duke tronditur UEFA-n në prag të Kongresit me dorëheqjen e tij.
Boban nuk është dakord me ndryshimin e statutit nga Ceferin, që do ta lejonte këtë të fundit të rikandidonte përtej 2027-ës. Ish-mesfushori i famshëm ka bërë të ditura arsyet e dorëheqjes me një letër të hapurt. UEFA në anën tjetër me pak radhë ka bërë me dije se largimi i Bobanit është bërë me një akord të përbashkët.
“Më vjen shumë keq, por me zemër të thyer largohem nga UEFA”. Kështu mbyllet letra e tashmë ish “Head of football” në Nion. Kroati u zgjodh nga presidenti Aleksander Ceferin si këshilltar personal i tij në prill të 2021-shit. Por ishte pikërisht përplasja me Ceferin për disa tema të rëndësishme arsyeja e lamtumirës së Boban nga qeveria e futbollit europian.
Një humbje për Nionin, që në të ardhmen e afërt duhet të përballet me pasojat e sentencës së Trupës së BE-së. Gjykatësit e Luksemburgut kanë autorizuar edhe privatët të krijojnë një turne (Superliga e famshme).
Në qendër të cështjes është vendimi për rishikimin e statutit në lidhje me presidencën e UEFA-s. Një ndryshim, që Boban dhe jo vetëm ai, e gjykon kundër vlerave, nga të cilat duhet të frymëzohet UEFA. Pas zgjedhjeve në shtator 2016, Ceferin kishte futur limitin e 3 mandateve presidenciale.
Për pasojë, në 2027-ën nuk mund të rikandidojë. Në Kongresin e Parisit, më 8 shkurt, do të votohet për një ndryshim që do ta lejonte sllovenin për një mandat të ri në teori, falë interpretimit të ri të një neni: limit i 12 viteve vlen për atë që kandidon pas hyrjes në fuqi të rregullit, jo për atë që është zgjedhur më parë, si Ceferin.
Për Bobanin është problematike edhe zgjatja e moshës për pjesëtarët e Komitetit Ekzekutiv, që mund të zgjidhen edhe pasi të kenë mbushur 70 vjeç. “Bëhet fjalë për një propozim për modifikimin e statutit të UEFA-s, që mundëson presidentin aktual të kandidojë sërish pas këtij mandati që duhej të ishte i fundit.
Pasi shpreha shqetësimin tim të madh dhe jam totalisht kundër, presidenti më tha se për atë nuk ka asnjë problem ligjor dhe aq më shumë etik e moral dhe se do ta vazhdonte pa asnjë dyshim rrugën e tij”, – vazhdon letra e Boban.
Nëse Kongresi në Paris jep ‘ok’-in për modifikimin e statutit, nuk ka formalisht asnjë problem ligjor. Por nga pikëpamja etike është ndryshe. Ceferin duhej të përfaqësonte UEFA-n e re dhe ky vendim është një hap prapa.
“Paradoksalisht, – vazhdon Boban, – në 2017-ën ishte pikërisht Ceferin që propozoi një paketë reformash që e mohonin qartësisht këtë mundësi. Rregulla që duhej të mbronin UEFA-n dhe futbollin europian nga ‘bad governance’, që për vite ka qenë problemi i sistemit të vjetër.
Diçka e jashtëzakonshme për futbollin dhe Ceferin. Tani ky distancim nga ato vlera, duke fshirë reformat më të rëndësishme, është i papranueshëm, veçanërisht në këtë moment”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
