.png)
Nga Gazeta Si - “Unë bëj filma për ekranin e madh, më pëlqen ndjenja e komunitetit që përjetoni në sallat e kinemasë. Njerëz të kulturave dhe përvojave të ndryshme i bashkohen kinemasë për ta përjetuar atë së bashku. Është diçka me të cilën u rrita, që më frymëzoi të ëndërroja dhe më shtyu të udhëtoja”, thotë Tom Cruise, në Trinità dei Monti, në një nga dy tapetet e kuq romakë (tjetri është në Auditorium Conciliazione) për premierën botërore të një prej filmave më të pritur të sezonit, “Mission Impossible - Dead Reckoning Part 1” nga Christopher McQuarrie, aventura e shtatë për agjentin sekret, Ethan Hunt.
Në kast me të mes kthimeve dhe hyrjeve të reja janë Hayley Atwell, Ving Rhames, Simon Pegg, Rebecca Ferguson, Vanessa Kirby, Henry Czerny, Esai Morales, Frederick Schmidt, Shea Whigham, Pom Klementieff, Greg Tarzan Davis, Mariela El Garriga dhe Cary.
“Që fëmijë, ëndrra ime ishte të bëja filma dhe të udhëtoja nëpër botë, jo si turist, por të zhytesha në vetvete dhe të njihja thellë kulturat e ndryshme. Dhe duke parë filmat e mi, mendoj se ia kam dalë. E kam përmbushur ëndrrën dhe privilegjin e argëtimit, diçka që nuk e kam marrë kurrë si të mirëqenë. Pasioni im për filmat pasqyron pasionin tim për të krijuar argëtim. Unë luftoj për kinematë, sepse ato ua sjellin të gjithëve këto përvoja”.
Zgjedhja e Romës për premierën e Mission Impossible është edhe për shkak të kapitullit substancial italian në film, me pjesë të historisë të vendosura në Venecia dhe Romë, ku Hunt/Cruise është i lidhur me pranga me një nga personazhet kyç të Dead Reckoning, enigmatiken Grace (Atwell), është protagonistja e një ndjekjeje të guximshme nëpër rrugët e kryeqytetit, nga Koloseu në Piazza Venezia, nga Via Nazionale në Trinità dei Monti.
“Është e jashtëzakonshme të xhirosh në vende të tilla, nuk do ta harroj kurrë”.
Në “Dead Reckoning”, Ethan Hunt dhe ekipi i tij duhet të gjejnë një armë shumë të rrezikshme përpara se të bjerë në duart e gabuara. Midis aleatëve dhe armiqve janë Grace (Atwell), kolegia Ilsa (Ferguson, tashmë e pranishme në dy filma të tjerë të sagës), ‘Vejusha e Bardhë’ (Kirby) dhe Parisi (Klementieff). Xhirimet e “Dead Reckoning” - Pjesa 1, i cili kushtoi 290 milionë dollarë (gjashtë filmat e mëparshëm fituan rreth 3 miliardë e 600 milionë dollarë në mbarë botën) u ndërprenë vazhdimisht për shkak të Covid, gjë që çoi në zgjatjen e prodhimit për tre vjet.
“Këta filma janë sfida të mëdha prodhimi, - thotë Tom Cruise, - dhe aq më tepër në periudhën që kemi kaluar. Nuk do të kishim mundur ta realizonim këtë kapitull pa mbështetjen që morëm nga njerëzit dhe institucionet në të gjitha vendet ku filmuam, si Roma dhe Venecia”.
Për aktorin dhe producentin, “sfida kryesore është gjithmonë të krijojë historinë më të mirë të mundshme, t’i japë çdo personazhi thellësinë që meriton, të krijojë një kinema që përfshin”. Edhe për Hayley Atwell “çdo ditë përfaqësonte një sfidë të re, një shije të re. Ne u mbështetëm nga një ekip i jashtëzakonshëm ‘stuntman’, për të siguruar në të njëjtën kohë spektakolaritetin, sigurinë tonë dhe gëzimin për të jetuar këtë përvojë”.
Një aventurë që, së bashku me pjesën e dytë të “Dead Reckoning”, mendohej të ishte fundi i ciklit për Tom Cruise (i cili, si zakonisht, ka kufizuar përdorimin e stuntman në skenat e tij spektakolare të aksionit), duke menduar për një vazhdim të mundshëm të sagës me protagonistë të tjerë. Megjithatë, një ide e mohuar së fundmi nga Chris McQuarrie, i cili tashmë po mendon për kapituj të rinj së bashku me Cruise.
Xhirimet e pjesës 2 të Dead Reckoning tashmë kanë filluar: “Gjithçka që shihni në këtë pjesë të parë vjen nga gjithçka që kemi mësuar në filmat e mëparshëm së bashku, - shpjegon fituesi i Oskarit McQuarrie, - dhe nuk po flas vetëm për Mission Impossible, por edhe për filma si “Edge of Tomorrow” ose “Maverick”. Në të njëjtën mënyrë do të pasurojmë pjesën e dytë të Dead Reckoning me përvojat e të parit. Do të jetë një film edhe më i pakufishëm”. /La Stampa/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
