Banka e Shqipërisë thotë se stoku i depozitave në sistemin bankar është shtuar me rreth 13.6 miliardë lekë në tremujorin e dytë të vitit, ose rreth 6% në terma mesatarë vjetorë.
Zgjerimi i tyre ka ardhur si pasojë e shtimit të depozitave në lekë, të cilat kanë shënuar rritje me 17 miliardë lekë, duke kompensuar tkurrjen me rreth 3.4 miliardë lekë të depozitave në valutë.
Rënia e depozitave në valutë gjatë kësaj periudhe është e përqendruar në muajin prill.
Banka argumenton se kjo sjellje reflekton kryesisht tkurrjen e depozitave në valutë të bizneseve, të cilat në kushtet e pandemisë Covid-19, kanë përdorur pjesërisht fondet e tyre për plotësimin e nevojave afatshkurtra për likuiditet.
Depozitat e individëve kanë kontribuar në zgjerimin e stokut total të depozitave, duke shënuar rritje me rreth 9 miliardë gjatë kësaj periudhe.
Gjatë kësaj periudhe është vënë re se depozitat pa afat në sistemin bankar përbëjnë rreth 48.5% të totalit të depozitave në muajin qershor, duke shënuar një rritje të peshës së tyre me 0.7 pikë përqindjeje nga fundi i tremujorit të parë të vitit.
Ndërkohë, ka vijuar dhe zhvendosja e pjesshme drejt depozitave me afat maturimi mbi dy vjet, por me ritme më të ulëta. Pesha e tyre është rritur me 0.2 pikë përqindje nga muaji mars, në 13.6% ndaj stokut total të depozitave.
Likuiditete
BSH bën me dije se masa monetare në ekonomi ka vijuar të rritet që nga fillimi i vitit, duke përshpejtuar më tej normat e rritjes në tremujorin e dytë të vitit.
Treguesi i parasë së gjerë, shënoi rritje mesatare vjetore me 7% gjatë kësaj periudhe, rreth dy pikë përqindjeje më shumë krahasuar me tremujorin e parë. Zgjerimi i ofertës monetare sipas BSH-së, reflekton financimin e sektorit privat dhe atij publik me mjete monetare.
Huamarrja e sektorit privat në sistemin bankar është mbështetur nga paketat e masave të ndërmarra nga qeveria dhe Banka e Shqipërisë, për zbutjen e pasojave negative në aktivitetin kreditues dhe efekteve zinxhir në ekonomi, të shkaktuara nga pandemia.
Në veçanti, masat e ndërmarra nga qeveria, të ofruara plotësisht në monedhë vendase, kanë ndikuar ndër të tjera në zgjerimin e shpejtë të parasë në lekë. Ky i fundit shënoi rritje vjetore mesatare me 8.5% në tremujorin e dytë të vitit, krahasuar me 3.9% në tremujorin e parë.
Po ashtu edhe treguesi që mat likuiditetin ka pësuar gjithashtu rritje të shpejtë, me 15.6% në terma mesatarë vjetorë për të njëjtën periudhë.
Raporti i parasë jashtë bankave ndaj agregatit në lekë, shënoi vlerën 28.6% në muajin qershor, një rritje me mbi 1 pikë përqindjeje nga fundi i tremujorit të parë.
Në terma afatshkurtër, kjo rritje ka ardhur si nga shtimi i kërkesës për para likuide për arsye transaksionesh, ashtu dhe ndikimin e ndihmave financiare të dhëna nga qeveria në kuadër të pandemisë.
Gjithashtu, normat e ulëta të interesit kanë ndikuar rritjen e kërkesës për mjete monetare likuide.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
