Lëkundjet e tërmetit të mbrëmshëm që ra në Follorinë të Greqisë, janë ndjerë më së shumti në zonën e Devollit, si zonë kufitare.
Sipas të dhënave të deritanishme, ka 6 raportime për dëmtime banesash, 2 në Bilisht, 2 në Mançurisht e 2 në Shuec, kryesisht banesa të vjetra.
Banorët kanë njoftuar instancat lokale në lidhje me situatën. Sipas komunikimit me kryetarin e bashkisë, Eduart Duro, grupet e emergjencave civile kanë nisur verifikimin në terren për rastet e raportuara.
Paraprakisht thuhet se banesat, të cilat janë bërë raportime për dëmtime, janë të vjetra dhe të amortizuara, të cilat kanë pasur probleme edhe më parë.
Mbrëmjen e të dielës, lëkundje të forta sizmike u ndjenë në disa qytete të Shqipërisë, duke shkaktuar panik mes qytetarëve, por për fat të mirë nuk ka pasur persona të lënduar. Tërmeti u ndje në Tiranë, por edhe në zonat jugore dhe juglindore të vendit, si Korçë, Gjirokastër, Vlorë, Berat, Elbasan.
Sipas të dhënave sizmiologjike, tërmeti ka qenë me epiqendër në zonën e Follorinës në Greqi me magnitudë 5.6 ballë, ndërsa dridhjet e forta janë ndier edhe në Maqedoninë e Veriut.
Disa minuta më vonë, dy tërmete të tjerë goditën Greqinë, njëri me magnitudë 3.5 dhe tjetri 4.8. Duke qenë se është më afër epiqendrës, zona me e goditur në Shqipëri është ajo e Korçës dhe e Pogradecit.
Departamenti i Sizmiologjisë i Institutit të Gjeoshkencave në Shqipëri njoftoi se tërmeti ka rënë në një thellësi 9 kilometra nën tokë.
M5.5 #earthquake (#земјотрес) strikes 132 km S of #Skopje (North Macedonia) 15 min ago. Updated map of its effects: pic.twitter.com/aQfTxGjBxf
— EMSC (@LastQuake) January 9, 2022
“Sot në datën 09/01/2022, ora 22:43 (ora lokale), Rrjeti i Monitorimit Sizmologjik i IGJEO ka regjistruar një termët të madhësisë M5.6 sipas shkallës Rihter, me thellësi të vatrës 9 km. Epiqendra është lokalizuar 40 km në Veri-Lindje të Bilishtit. Intensiteti i tërmetit vlerësohet paraprakisht 6 ballë sipas shkallës MSK-64. Nuk kemi njoftime për dëme”, thuhet në njoftimin e Institutit të Gjeoshkencave.
Ministri i Mbrojtjes Niko Peleshi informon se Emergjencat Civile janë në gatishmëri për të evidentuar nëse ka dëme apo të lënduar.
“Lëkundjet e tërmetit që u ndjenë edhe në vendin tonë e kishin epiqendrën në kufirin mes Maqedonisë së Veriut dhe Greqisë, sipas të dhënave paraprake nga IGJEUM, rreth 40 km në Veri-Lindje të Bilishtit me magnitudë 5.6 sipas shkallës Rihter. Intensiteti i tërmetit vlerësohet paraprakisht 6 ballë sipas shkallës MSK-64”, – thuhet në njoftimin e ministrit të Mbrojtjes Niko Peleshi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
