Mbrëmja e së premtes ka qenë tejet e tensionuar në Dibër, ku përplasjet mes mbështetësve të opozitës dhe policisë përpara KZAZ-së 19 sollën edhe përdorimin e gazit lotsjellës nga ana e uniformave blu me qëllim për të shpërndarë turmën që ishin mbledhur përpara shkollës “Nazmi Rushiti”.
Në informacionet e Drejtorisë së Policisë mësohet se për shkak të këtyre përplasjeve janë plagosur 18 shtetas, duke përfshirë edhe punonjësit e policisë. Pikërisht për këto përplasja ka pasur akuza dhe kundërakuza mes ministrisë së Brendshme dhe Partisë Demokratike. Ministri Lleshaj do të deklaronte se “verbëria e dhunës politike po sulmon sot me molotov KZAZ e vendosur në shkollën “Nazmi Rushiti” dhe Policinë në Dibër, nën drejtimin e përfaqësuesve të lartë të opozitës. Ligji do të veprojë pa asnjë mëdyshje ndaj çdo forme të krimit!”.
Opozita ka ana saj do të shprehej se ky ishte një skenar i organizuar nga qeveria, e cila kërkonte të krijonte tension. Akuzave të policisë për dhunë ndaj punonjësve të saj, Partia Demokratike ka iu kundërpërgjigj me një video të një infermiere, e cila raportonte se 7 policët ishin dëmtuar nga përdorimi i gazit lotsjellës, duke hedhur poshtë se ata janë goditur.
Për shkak të ngjarjes së rëndë të sulmit në KZAZ-së, ish-deputeti i PD-së, Xhemal Gjunkshi në një deklaratë për median akuzoi policinë se po ushtronte dhunë ndaj qytetarëve dhe se opozita kishte për qëllim vetëm të marshonte në këtë tubim. “Protesta ishte në formën e marshimit, shumë e qetë dhe qytetare. Provokimet ishin të gjitha nga policë civilë dhe persona të panjohur, të infiltruar nga policia, gjë e cila u konstatua që në fillim të protestës. Nga ana e protestuesve nuk është lënduar, dëmtuar asnjë punonjës i policisë së shtetit apo qoftë edhe një qytetar i thjeshtë. Deklarata në ngutje e sipër e Ministrit Lleshaj dhe policisë së shtetit ,ka qenë tërësisht një mashtrim dhe një turp shumë i madh”, tha Gjunkshi.
Ai fajësoi policinë për dhunën e ushtruar nga forcat speciale RENEA, FNSH dhe policia vendore e Dibrës. “Në shkelje të plotë të ligjit, policë me maska të veshur si terroristë kanë shqyer dyert, kanë kontrolluar dhe kanë shoqëruar 12 qytetarë. Kundrejt personave të shoqëruar dhe familjarëve të tyre është ushtruar dhunë fizike, ç’ka është e papranueshme. Kontrollet kanë vijuar nga ora 02:30 e natës e në vazhdim, duke goditur e masakruar gra e fëmijë. Në fshatin Tomin është goditur një grua e cila vazhdon të jetë ende në gjendje të rëndë, madje policia ka goditur edhe djalin 14 vjeçar i cili ka tentuar t’i japë ndihmë nënës së tij dhe nuk është lejuar ta çojë në spital, duke i thënë lëre të vdesë aty”, vijoi ish-deputeti demokrat.
PD publikoi dhe një tjetër video ku jepej dëshmia e një qytetari për dhunën që ka ushtruar policia. “Ishte ora 03.00 e mëngjesit. Unë rri në kat të parë dhe në kat të dytë dhe të tretë I kishin thyer dyert të gjitha. Kur dola unë ata po zbritnin poshtë. Ishin me maska, kallashnikov dhe gjithçka. Në atë kohë u thashë: Çfarë është? Jo s’kemi punë, më tha kush je. I thashë emrin, pastaj ata shkuan te nusja e kushëririt. Ngaqë e dija që ishte me 3 fëmijë të vegjël shkova atje. Kur shkova atje, ata aty më shtynë, nuk më lanë dhe më përplasën për mur. Nuk më lanë që të shkoj aty. E dija që kishte për ti rënë të fikët nuses së kushëririt. Asaj i ra të fikët në rrugë, ndërsa djali I kushëririt shkoi të marrë makinën, policët I thanë; lere të vdesë në rrugë, sepse I ra të fikët në rrugë. Policët na kanë godit mua dhe djalin e kushëririt, na kanë rrahur. I kanë future dhe në furgon dhe i kanë rrahur me shkop gome, plus që e kanë godit dhe në fytyra”, shprehet ai në video.
Për PD-në kjo ishte e inskenuar për shkak në Dibër deri në ora 10:00 të ditës së sotme nuk kishin mbërritur materialet zgjedhore.
Policia arreston 12 persona, 39 në kërkim
Për ngjarjen e së premtes, policia ka deklaruar se ka arrestuar 12 persona dhe se 39 prej protestuesve janë shpallur në kërkim. “Protestuesit kanë përdorur sende të forta, kapsolla dhe bomba molotov në drejtim të KZAZ-s, si dhe në drejtim të punonjësve të Policisë që ishin të vendosur me shërbim. Materialet procedurale në ngarkim të autorëve të sulmit i kaluan Prokurorisë pranë Gjykatës së Shkallës Parë Dibër, për veprat penale: ‘’Shkatërrimi i pronës me zjarr’’, ’’Kundërshtimi me dhune i punonjësve të policisë rendit publik’’ dhe ‘’Dëmtimi me dashje i materialit zgjedhor”, parashikuar nga neni 151/2, dënimi nga 5 deri në 15 vjet, Neni 236/2 dënimi me gjobë, ose burg deri në 7 vjet dhe Neni 326/a dënimi me burg nga 6 muaj deri ne 5 vjet”, deklaroi policia.
Policia e Shtetit shprehet se “siguron qytetarët se është tërësisht e angazhuar dhe ka marrë të gjitha masat për të garantuar procesin zgjedhor, duke goditur me ashpërsinë e forcës së ligjit çdo individ që përfshihet në aktivitet kriminal”.
Ish-kryeministri Sali Berisha do të postonte një video ku sipas tij, forcat speciale të policisë kanë pasur debate dhe përplasje me banorë të Dibrës.
Protesta të premten pati edhe në Mat përpara KZAZ-së. Opozitarët të mbledhur përpara shkollës së kësaj KZAZ-je theksuan se falë qytetarisë së treguar është shmangur një konflikt civil mes mbështësve të dy kampeve, pasi aty gjendej edhe një grupim i militantëve socialistë, së bashku me kandidatin për kryetar bashkie, Agron Malaj. Kreshnik Çollaku përfaqësuesi i PD-së në Mat shprehet në një status në Facebook se “Demokratët dhe qytetarët e Matit me gjakftohtësi e qytetari shmangen një përplasje civile mes qytetareve matjanë. Sot demokratët dhe qytetarët matjanë shpartalluan me qytetari dhe vendosmëri skenarin Rilindas për përplasje civile. Sot demokratët e matit fituan betejën për zemrat mendjet dhe dinjitetin e matjanëve”.
Mbyllen shkollat, policia arreston zyrtarët e bashkive të opozitës
Ditën e sotme bashkitë e opozitës kanë urdhëruar mbylljen e shkollave, në të cilën janë ngritur edhe një pjesë e Qendrave të Votimit. Në Mallakastër janë mbyllur 23 shkolla, e për këtë policia ka arrestuar punonjës të bashkisë. Sipas policisë së Fierit, të arrestuar janë një shofer i bashkisë, një punonjës i saj dhe roja i një shkolle. Ndërkohë në kërkim është shpallur nënkryetari i bashkisë. E njëjta situatë ka ndodhur edhe në bashkinë e Pogradecit, ku policia ka arrestuar disa nëpunës të këtij institucioni për shkak se kanë tentuar të mbyllin shkollat.
Bashkia Shkodër në një njoftim të ngjitur në portat e shkollave njofton se institucionet do shërbejnë sipas funksionit që kanë të përcaktuar në dokumentin e pronësisë dhe nuk do lejohet të përdoren për asnjë qëllim tjetër.
Ndërsa paralajmëroi se kushdo që guxon të cenojë institucionet publike do të përgjigjet penalisht. “Në zbatim të dekretit të Presidentit për shfuqizimin e datës së zgjedhjeve më 30 qershor 2019 për organet e qeverisjes vendore, ju informojmë se ndërtesat në pronësi dhe administrim të Bashkisë Shkodër janë në shërbim sipas funksionit që ato kanë përcaktuar në dokumentin e pronësisë. Askush nuk është i lejuar ti përdorë ato për qëllime të tjera pa autorizimin e Bashkisë Shkodër. Sipas përcaktimit ligjor ky objekt është i paprekshëm pa lejen e institucionit të bashkisë.
Kushdo që guxon të uzurpojë dhe të cenojë institucionet publike në kundërshtim me ligjin do të përgjigjet penalisht,”-shkruhet në njoftimin e Bashkisë.
Kryetari i bashkisë, Eduart Kapri në një prononcim për median denoncoi arrestimin e dy punonjësve të administratës, sipas tij ata po kryenin vetëm detyrën. “I bëjmë thirrje Policisë të Shtetit dhe Prokurorisë të lirojë menjëherë dy punonjësit e administratës të Bashkisë, pasi këta punonjës si çdo ditë tjetër ndodheshin pranë këtyre shkollave duke kryer punën e përditshme për përmirësimin e kushteve të shkollave, kopshteve dhe ruajtjen e ambienteve të tyre. Ju bëjmë thirrje të gjithë qytetarëve, të mos tremben dhe frikësohen nga ky lloj presioni. Të mos bien pre e asnjë lloj provokimi duke shmangur çdo lloj situate konfliktuale për të treguar qytetari dhe përgjegjshmëri duke mos u bërë shkas për përplasje civile. Gjithashtu denoncojmë dhe kërkojmë masa të menjëhershme për arrestimin e personave, të cilët nga mëngjesi i sotëm po shkatërrojnë në mënyrë të paligjshme dyert e institucioneve arsimore që janë në pronësi të Bashkisë . Bashkia Pogradec është në mbrojtje të ligjit dhe Kushtetutës si dhe në zbatim të plotë të Dekretit të Presidentit të Republikës”, deklaroi Kapri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
