.png)
Gazeta Si – Të enjten në ‘Loro Boriçi’ vjen… Real Madrid. Një njoftim që duket si një shaka, apo një montazh tifozësh. Por jo, nuk është kështu. Këtë njoftim e bën faqja zyrtare e Vllaznisë, sepse të enjten në Shkodër vjen vërtet ekipi i madh spanjoll.
Ai i femrave. E sjell Vllaznia në futboll për femra, ekipi që këtë sezon ka hyrë në histori. Për herë të parë një ekip futbolli femrash ka arritur të kualifikohet në fazën e grupeve të Ligës së Kampionëve.
Dhe shorti e ka shpërblyer, duke i dhuruar tre emra të mëdhenj të futbollit europian, Realin, Çelsin dhe PSG-në. Do të jetë një aventurë e gjitha për t’u shijuar nga vajzat e Vllaznisë, të cilat e kanë përmbushur tashmë misionin e tyre.
Misioni i radhës ëhstë argëtimi në fushë dhe i tifozëve në tribunat e Loro Boriçit. Këta të fundit do të kenë shansin të presin në stadiumin e tyre Realin të enjten, në orën 18:45.
Vllaznia e presidentit Lazër Matija është përforcuar shumë në merkato, me futbolliste amerikane dhe të huaja të tjera, pasi kalimi në grupet e Championsit kuptohet që kërkon më shumë cilësi.
Të enjten në mbrëmje tifozët shkodranë do të përjetojnë emocione të pazakonta, që ua dhuron Vllaznia e femrave. Pas Realit, ‘Loro Boriçin’ do ta vizitojnë edhe Çelsi dhe PSG.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
