Sulmi në Nju Jork, Salman Rushdie ka humbur njërin sy dhe njërën dorë

Gazeta Si – Shkrimtari anglo-indian, Salman Rushdie, i cili u sulmua dy muaj më parë teksa mbante një fjalim në Chautauqua të Nju Jorkut, humbi shikimin në njërin sy dhe përdorimin e njërës dorë.

Ishte agjenti i tij, Andreë Wylie në një intervistë me gazetën spanjolle “El País”, i cili e zbuloi: “Plagët e tij janë të thella. Ai nuk sheh në njërin sy, ku është goditur me thikë. Ai ka pësuar tre lëndime të rënda në qafë dhe nuk ka më funksion në njërën dorë për shkak se nervat e krahut i janë shkëputur nga plagët me thikë. Sulmuesi ka shkaktuar 15 plagë me thikë në shpinë dhe në bust. Ishte një sulm brutal”, tha ai.

Shkrimtari 75-vjeçar ka qenë nën ruajtje që nga viti 1989, kur pas botimit të Vargjeve Satanike, Ajatollah Khomeini lëshoi një fetva kundër tij duke urdhëruar vrasjen e tij, sepse ai ishte “fajtor” për blasfemi kundër Muhamedit dhe Kuranit.

Më vonë, për kokën e tij u vendos një shpërblim prej mbi tre milionë dollarësh.

Në atë kohë Rushdie u vu nën mbrojtjen e policisë britanike dhe u fsheh nën një emër të rremë për më shumë se një dekadë.

Në fillim të viteve 2000, pasi kishte rifituar lirinë e lëvizjes, ai u transferua në Nju Jork ku, padyshim, me kalimin e viteve, ai e la vigjilencën e tij.

Dy javë para sulmit, ai tha se tani e ndjente “se ishte kthyer në normalitet dhe se frika i përket së shkuarës.”

“Më duhet të jetoj jetën time”, përsëriti disa herë. Sulmi ndodhi më 12 gusht 2022, ndërsa Rushdie ishte në skenë për të mbajtur një fjalim mbi lirinë artistike në Institutin Chautauqua, ku masat e sigurisë ishin shumë të lehta.

Sulmuesi është Hadi Matar, 24 vjeç, i lindur në Kaliforni në një familje me origjinë nga Libani.

Autori u deklarua i pafajshëm kur u paraqit në gjykatë më 18 gusht dhe tha se veproi sepse shkrimtari gjoja ofendoi Islamin.

Qeveria iraniane tha se nuk kishte asnjë përgjegjësi, sepse agresori veproi i vetëm dhe me iniciativën e tij.

Wylie nuk ka dashur të zbulojë nëse shkrimtari është ende në spital apo jo: “Ai do të mbijetojë. Kjo është gjëja më e rëndësishme”.

“Rreziku kryesor për të ka qenë gjithmonë sulmi i një ujku të vetmuar, – shtoi ai, – nuk mund të mbrohesh nga diçka që është krejtësisht e palogjikshme dhe e papritur”.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.