Organizatorët e protestës studentore thonë se bojkoti dhe përshkallëzimi i tubimeve do të ndodhë përsa kohë Qeveria nuk tërhiqet nga vendimi i saj për tarifat.
Protestuesit kanë hartuar një listë me katër kërkesa. Dy prej tyre i drejtohen Qeverisë.
“Anulimin e Vendimit të Këshillit të Ministrave nr. 288, të miratuar më 21.05.2018, sidomos pikën 4 të tij që u vendos një gjobë të padrejtë studentëve për provimet e mbartura. Rritjen e buxhetit të shtetit për universitetet publike dhe përgjysmimin e të gjitha tarifave universitare duke ulur tavanin e tarifës maksimale”, thuhet tek kërkesat e publikuara nga lëvizja “Për Universitetin”.
Për drejtuesit e universiteteve publike adresohen dy kërkesat e tjera.
“Ndarjen e pagesës së tarifës në dy këste dhe shtyrjen e afatit të pagesës së secilit këst përtej sezonit të provimeve të semestrit të parë”, thuhet në deklaratë.
Studentët paralajmërojnë bojkotimin e mësimit për ditën e sotme, grumbullimin në oborret e fakulteteve dhe universiteteve përkatëse dhe marshimin drejt godinës së Ministrisë së Arsimit në orën 10:00.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
