Gazeta Si – Gjashtë ditë pas përmbytjeve që goditën Spanjën dhe në veçanti rajonin e Valencias, qeveria ende nuk ka dhënë një numër të personave të zhdukur.
“Ne nuk mund të japim një numër vërtet të besueshëm,” tha ministri i Brendshëm Fernando Grande Marlaska, i cili konfirmoi se numri i përkohshëm është 222 viktima.
Ndërkohë, një alarm i kuq është ndezur në brigjet e Barcelonës, me 17 fluturime avionësh të devijuara nga autoritetet për shkak të motit të keq.
Për shkak të ndikimit të një fenomenit “Dana”, i cili lëviz në veri të Levantes, u lëshua një alarm i ri i kuq nga Mbrojtja Civile me mesazhe es-Alert për shirat e rrëmbyeshëm, që goditën provincën e Castellon, Katalonjë dhe provincën e Barcelonës.
“Është një e katërta e shiut që bie gjatë gjithë vitit në vetëm katër orë”, thekson Rubén del Campo, zëdhënës i “Aemet”, Agjencisë Kombëtare të Motit.
Lidhjet hekurudhore rajonale u ndërprenë dhe të paktën 17 fluturime u devijuan nga aeroporti El Prat i Barcelonës, ku shirat e dendur përmbytën një pjesë të pistës së aeroportit.
Trafiku i makinave në autostradën AP7 pranë Tarragona u ndërpre gjithashtu. Alarmi nga agjencia shtetërore e meteorologjisë ka të bëjë me të gjithë bregdetin e Barcelonës dhe parashikon reshje të grumbulluara në 12 orë prej 180 litra për metër katror, të cilat do të prekin kryesisht zonën e Baix Llobregat.
Ndërkohë, kryetari i bashkisë së Aldaia në Valencia, Gullermo Lujan, tha: “Në parkingun e qendrës tregtare Bonaire u identifikuan 20 automjete dhe pa u konstatuar prania e viktimave”. Alarmi i kuq është ndezur për bregdetin e provincës së Barcelonës.
Sipas ministrit të Brendshëm, në fakt janë të shumta rastet që familjarët nuk kanë mundur të kontaktojnë me të dashurit e tyre dhe siguroi se “policia dhe garda civile po hetojnë të gjitha raportimet për persona të zhdukur”.
Nga 222viktimat, 214 janë regjistruar në provincën e Valencias, ndërsa të tjerat në Castilla La Mancha dhe një në Andaluzi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
