Gazeta Si – Me vendim të Gjykatës së Tiranës, e cila vendosi masën “arrest në burg”, policia ka arrestuar 30-vjeçarin Elvis Miri, banues në Krujë, pasi prej vitit 2016 merrte tendera për trajtimin e mbetjeve spitalore me dokumente false dhe pa pajisje.
Ndërkohë, janë pezulluar nga detyra 8 inspektorë të shtetit, si dhe masa “detyrim me paraqitje” është dhënë për 2 administratorë firmash private.
“Në kuadër të tij u ekzekutuan masat e sigurisë: “Arrest në burg”, për shtetasin E. M., 30 vjeç, banues në Krujë (administrator i një subjekti), për veprat penale “Falsifikimi i dokumenteve”, “Menaxhimi i mbetjeve” dhe “Aktivitetet e rrezikshme”; “Detyrimi për t’u paraqitur në Policinë Gjyqësore” dhe “Ndalimi i përkohshëm i ushtrimit të veprimtarisë financiare”, për shtetasen E. Sh., 45 vjeçe, banuese në Tiranë (administratore e një subjekti), si dhe për shtetasin L. Sh., 39 vjeç (administrator i një subjekti), për veprën penale “Falsifikimi i dokumentave’”, bën me dije policia.
Tre shtetasit e mësipërm, dyshohet se në bashkëpunim me njëri-tjetrin, nëpërmjet subjekteve që administronin, kanë shfrytëzuar një tender për trajtimin e mbetjeve të rrezikshme spitalore për spitalin e Beratit.
Policia thekson se njëri nga subjektet ka fituar tenderin për trajtimin e mbetjeve dhe në dokumentacionin pjesëmarrës në tendera është përdorur një shoqëri tjetër, e cila nuk ka patur teknologjinë e duhur, ndaj mbetjet e një spitali nuk janë asgjësuar sipas procedurës ligjore, për pasojë kanë krijuar problematika në shëndetin e njerëzve dhe në mjedis”.
Gjykata e Tiranës vendosi masën “Detyrimi për t’u paraqitur në Policinë Gjyqësore” dhe “Ndalimi i përkohshëm i ushtrimit të veprimtarisë financiare”, për E. Sh., 45 vjeçe dhe L. Sh., 39 vjeç, administratorë të dy subjekteve, për veprën penale “Falsifikimi i dokumentave”.
Ndërsa janë pezulluar nga detyra dhe ndalohen të dalin jashtë vendit personat J. Sh., 35 vjeçe, E. P., 59 vjeç, A. M., 53 vjeç, N. D., 42 vjeç, A. K., 39 vjeçe, B. L., 30 vjeçe, I. B., 48 vjeç dhe K. A., 33 vjeç, të dyshuar për shpërdorim detyre.
Një ditë më parë, në njoftimin e Prokurorisë Tiranë, thuhej se Miri merrte tendera për trajtimin e mbetjeve spitalore për t’i kthyer nga të dëmshme në të padëmshme.
Për këtë procedurë nevojitej pajisja Econos Tsc 150 dhe një incenerator për trajtimin e mbetjeve spitalore. Por edhe pse nuk i kishte këto pajisje Ervis Miri për 8 vite ka marrë 200 tendera.
“Ka marrë pjesë në mbi 200 procedura tenderi për asgjësim mbetjesh spitalore, prej vitit 2016 e në vijim, duke dorëzuar dokumentacion të rremë. Personi në hetim, pretendonte se kishte kapacitete për grumbullimin dhe trajtimin e mbetjeve spitalore duke i kthyer ato nga të dëmshme në të padëmshme por nga hetimi rezultoi se i mungonin pajisjet për ta realizuar një gjë të tillë”, thuhet në njoftimin e prokurorisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
