Shuhet në moshën 36-vjeçare aktori Darren Kent. Ai ishte i njohur për pjesëmarrjen në “Game of Thrones” dhe seriale dhe filma të tjerë televizivë.
Ai luajti role të shkurtra në programet televizive, “Green Fingers” dhe “Malpractice”.
Ai gjithashtu u shfaq në episodet e “East Enders” dhe në fillim të këtij viti luajti në “Dungeons and Dragons: Honor Among Thieves”.
Kent luajti rolin e tij si aktor në filmin “Mirrors” të vitit 2008, me Ben Carson, dhe më vonë fitoi çmimin e ‘aktorit më të mirë’ në ceremoninë e ‘Van D’or’ të vitit 2012 për personazhin Danny në filmin “Sunnyboy”.
Lajmi për vdekjen e tij u bë i ditur nga agjencia e tij ‘Carey Dodd Associates’. Nëpërmjet një njoftimi për publikun thuhej:
“Me pikëllim të thellë duhet t’ju themi se miku ynë Darren Kent ndërroi jetë të premten. Darren nuk ishte vetëm një aktor, regjisor dhe shkrimtar i talentuar, ai ishte me të vërtetë një nga njerëzit më të sjellshëm që kam pasur ndonjëherë kënaqësinë të takoja. Ka qenë një privilegj dhe kënaqësi të isha pjesë e rrugëtimit të tij. U prehsh në paqe”.
Postimi i fundit
Më 5 korrik, aktori kishte shkruar një postim në rrjetet e tij sociale, ku shprehej i entuziazmuar për premierën e afërt të projektit të tij të fundit, një film me titull “Alleviate”.
Sipas Daily Mail, aktori ishte një mbështetës i “Equal People Performing Arts”, një shoqatë që u dedikohet personave me aftësi të kufizuara në përpjekje për t’i bërë ata t’i bashkohen botës së spektaklit.
Sëmundje të ndryshme
Kent vuante nga artriti, osteoporoza dhe një sëmundje e rrallë e lëkurës. Rrjetet sociale u mbushën me mesazhe ngushëllimi nga njerëz që e njohën me rolet e tij në seriale dhe filma, por edhe nga kolegë e regjisorë që shprehën publikisht lamtumirën e tyre.
Regjisorja Jane Gull shkroi një postim duke thënë se “jeta thjesht nuk do të jetë e njëjtë” pa Kentin. “Çfarë privilegji ka qenë të jesh miku yt dhe të punosh së bashku në kaq shumë projekte gjatë viteve. Do të më mungosh shumë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
