Spitali “Shefqet Ndroqi”, njohur edhe si “Sanatoriumi” do të rikthehet si spital Covid-19. Vendimi është marrë nga Ministria e Shëndetësisë pas përkeqësimit të situatës si me raste të reja, ashtu edhe me shtimin e personave që kanë nevojë për shtrim në spital.
Vendimi do të nisë që të zbatohet nga dita e hënë. “News24” raporton se ditën e hënë do të nisë boshatisja e spitalit dhe dërgimi i pacientëve të tij në ambiente të tjera për t’i hapur rrugë funksionit të ri të ndërtesës nën masa të rrepta sigurie higjieno-sanitare.
“Shefqet Ndroqi” u hap si spital Covid-19 në fund të muajit mars, kur vendi sapo kishte hyrë në izolim. Pas rënies së numrit të rasteve të reja dhe të personave që kishin nevojë për shtrim, ky spital u mbyll si spital Covid-19 duke lënë vetëm Spitalin Infektiv në QSUT për pandeminë.
Ndërkohë, veç “Shefqet Ndroqit” Qeveria thotë se do të ketë gati shumë shpejt edhe godinën e ish-universitetit Kristal, që do të presë pacientët me koronavirus nëse do të jetë e nevojshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
