Nga Gazeta Si- Trafikantët shqiptarë të drogës po përdorin TikTok-un për të kërkuar shpërndarës droge në Angli.
Në një investigim, “The Sun” shkruan se në reklama u premtohen punëtorëve deri në 6 mijë paund në muaj për të shpërndarë kokainë dhe kanabis në një rrjet që shtrihet në të gjithë vendin.
Kjo pagesë shkon deri në 72,000 £ në vit, pa paguar asnjë taksë.
Një punonjësi që paguan taksa do t’i duhet një pagë prej të paktën 110,000 £ për të marrë në shtëpi të njëjtën shumë parash.
Në një shembull, ku baronët e drogës përdorin një emoji flok bore për të treguar kokainën, një reklamë ka një imazh të autobusëve tradicionalë të kuq në rrugën historike Regent.
Ky postim shoqërohet me fjalët “Kërkohet shofer (shoqëruar me emoji flokë dëbore) që ka përvojë në perëndim të Londrës. Shtatë ditë në javë, 200 paund dita. Makina dhe karburanti të siguruara. Vetëm njerëz seriozë”.
Të gjitha postimet shfaqin një bimë në vazo ose një pemë Krishtlindjesh që është kodi për drogën.
Një postim tjetër tregon 6 pemë krishtlindjesh dhe 3 bimë në vazo, me mbishkrimin “Kërkohen 3 punëtorë për një fermë kanabisi. Kush është i interesuar të fillojë punë, të shkruajë privatisht.”
“Kodet e stilit mafioz”
Në vitin 2022, Policia e Surrey publikoi një udhëzues që paralajmëronte prindërit për gjuhën e koduar, të përdorur në internet duke thënë: “Ka një botë sekrete emoji me kuptime më shqetësuese. Flokë dëbore është kokainë. Tregtarët mund të përdorin gjithashtu këtë gjuhë dhe disa nga këto emoji për të shfrytëzuar të rinjtë.”
The Sun on Sunday ka zbuluar gjithashtu një varg reklamash të TikTok për shqiptarët në Angli ku u ofrohet punë për tu kujdesur për fermat e kanabisit.
Në shumë prej postimeve përdoret fjala “punëtor”, dhe “pikat”, një term që përdoret për të treguar vendin.
Në një postim që “The Sun” disponon shkruhet se kërkohet punëtor me makinë në zonën e Portsmouth dhe rendit pagën si 1300 paund në javë, me një ditë pushimi.
Në një tjetër postim kërkohet një punëtor në Glasgoë, me strehim të paguar dhe një pagë prej 1700 paund në javë.
E njëjta gjë vlen edhe për vende si Bournemouth, Londër, Edinburg, Newcastle dhe Liverpool.
“Disa madje mburren se mund të sigurojnë punën me taksi”, shkruan The Sun.
Ervin Karamuco, profesor i kriminologjisë në Universitetin e Tiranës, tha se grupet kriminale shqiptare në Britani që përdorin mediat sociale për të reklamuar ofertën e tyre kriminale të punës është një taktikë e re.
“Ata duan të zgjerojnë ndërmarrjen e tyre, gjë që do të përbëjë një sfidë të re për agjencitë britanike të zbatimit të ligjit. Ata po përdorin kode të stilit mafioz për të nënkuptuar mundësitë e paligjshme të punësimit dhe këto janë të njëjtat që janë identifikuar në përgjimet e kaluara të bisedave telefonike të kriminelëve”, thotë Karamuço, duke shtuar kodi “punëtorët e pikave” është një kod i avancuar, i ngjashëm me atë të përdorur nga mafia italiane në vitet 1950, kur ata filluan t’u referoheshin shpërndarësve të drogës si ‘spacciatore’, ose shitësit.
I detyruar për të punuar
Shumë nga ata që synohen në postime të tilla janë shqiptarë që kanë mbërritur ilegalisht në Angli dhe duhet të paguajnë borxhet ndaj trafikantëve të njerëzve.
Më pas ata detyrohen të punojnë në çfarëdo lloj pune që zgjedhin kriminelët derisa borxhi të konsiderohet i paguar.
Andi Hoxhaj, lektor i drejtësisë dhe ekspert i Ballkanit në King’s College në Londër, thotë se në rrjetet kriminale të organizuara pothuajse ekskluzivisht punësojnë shqiptarë, veçanërisht të rinj shqiptarë, për të punuar për ta.
“Procesi i rekrutimit përfshin ose postime të synuara në mediat sociale ose gojë më gojë. Në mënyrë tipike, rrjetet kriminale ofrojnë të paguajnë për udhëtimin e të rinjve në Angli dhe ata duhet të paguajnë borxhet e tyre.”
‘Kërcënim akut’
Vitin e kaluar, Home Office tha se grupet shqiptare të krimit të organizuar janë një “kërcënim akut” për Anglinë dhe “shumë të përhapura në të gjithë krimin e rëndë dhe të organizuar”.
“Rreth 1700 anëtarë të bandës mendohet se janë të lirë në Angli dhe ka më shumë shqiptarë në burgjet britanike se çdo kombësi tjetër e huaj, pavarësisht se popullsia shqiptare është vetëm 2.8 milionë”, shkruan The Sun.
Më shumë se 450 shqiptarë u akuzuan vitin e kaluar për vepra, përfshirë furnizimin me drogë, pastrim parash dhe armëmbajtje.
Që nga fillimi i janarit, të paktën 11 tregtarë shqiptarë droge janë dënuar nga gjykatat britanike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
