.png)
Me kërkesë të Bashkisë së Tiranës, Agjencia Shtetërore për Shpronësimin ka shpallur në Fletoren Zyrtare kërkesën për shpronësim për interes publik të “Sarajeve” të Tiranës, kategorizuar si monument kulture i mbrojtur nga shteti, që pak ditë më parë u tentuan të digjeshin.
Sipas kërkesës së Agjencisë së Shtetërore të Shpronësimeve shpronësimi i “Sarajeve” kërkohet në kuadër të projektit restaurimi dhe rijetësimi i “Banesa e Toptanasv, Muzeu Etnografik i Tiranës.
“Me anë të këtij publikimi kërkojmë të vëmë në dijeni personat e prekur nga ky shpronësim, për pasuritë e paluajtshme, pronë private, të cilët do të kompensohen, sipas vlerësimit paraprak të
llogaritur”, thotë Agjencia.
Vlera totale paraprake e shpronësimit është përllogaritur në rreth 177 milionë lek.
“Sarajet” përfunduan në qendër të vëmendjes publike pas një tentative për djegien e tyre. Nga opozita akuzuan kryebashkiakun Erion Veliaj se qëndronte pas kësaj përpjekje për t’i hapur rrugë ndërtimit të kullave në këtë zonë.
Por, kryebashkiaku i Tiranës u përgjigj përmes publikimit të një videoje ku shfaqet një person me një pishtar flake në dorë teksa nxiton pranë Monumentit të Kulturës. Fatmirësisht flakët u vunë nën kontroll, ndërsa debati për autorësinë vijon ende.
Gazeta Si solli të martën një intervistë ekskluzive të Dilaver Laçit, ish-drejtor i zjarrfikësve, që akuzon ndërtuesit që qëndrojnë pas përpjekjeve për djegien e monumentit.
Po me kërkesë të Bashkisë së Tiranës, Agjencia Shtetërore e Shpronësimeve ka publikuar në Fletoren Zyrtare edhe vlerësimin e Sarajeve të Libohovitëve. Në vlerësimin e Agjencisë, kjo pronë vlen paraprakisht rreth 506 milionë lek.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
